له تېرو څو ورځو راهیسې په خواله رسنیو کې (د هزاره وژنه بس کړئ) هشټګ کارول کېږي، ظاهرآ دا هشټګ وروسته له هغې په خواله رسینو کې پراخ شو،چې کابل کې پر کاج ښوونیز مرکز برید کې لسګونه زده کونکو خپل ژوند له لاسه ورکړ.
اخوا بیا دې شعار غبرګونونه هم له ځانه سره درلودل،د خواله رسنیو یو شمېر نورو کاروونکو بیا (یونایډیډ افغانستان) شعار بدرګه کړ،چې تر دې دمه د ټویټر لس ګونه زره کاروونکو کارولی دی.
د سیاسي چارو شنونکی سلیم پيګیر وايي:« که چېرې موږ پر افغان وژنې بحث وکړو،په تېرو ۴۳ کلونو کې افغان وژنه وه، خو د تاجک، پښتون او هزاره په نامه څوک نه دي وژل شوي، که وژل شوي د افغان په نامه شوي. دا چې د هزاره وژنې په تړاو لاریونونه دي، د دې لاندې ډېرې نورې خبرې دي. هر افغان چې دا موضوع درک کړي،له دې سره نه یو ځای کېږي، ځکه که فکر وکړو،د دې مصرف څوک ورکوي؛ نو دا د دې لپاره دي،چې افغان ټوټه کړي او ملیتونه سره بېل کړي.»
عصمت قانع پر خپله ټویټرپاڼه داسې لیکلي:« په افغانستان کې هر ډول انسان وژنې ته د پای ټکی کېږدئ. هزاره د افغانستان مالک، تاجک د افغانستان نګه مالک، پښتون د افغانستان مالک او ازبک هم د افغانستان مالک دی. د قومونو ترمنځ تبغیض بېګانه هڅه ده. زموږ یوازې یووالی په افغانستان کې د مساوي مالکیت حق ته رسولی شي.»
ډاکټر لطیف نظري بیا لیکلي:«یو متحد، پياوړی، قوي او خپلواک افغانستان د دښمنانو لپاره د تحمل وړ نه دی. پر همدې اساس دښمن قومي مسایل مطرح کوي، خو د افغانانو ترمنځ یووالی او وحدت هغه څه دي، چې د مزدورو دښمنانو موخو ته رسېدل یې ناکام کړي.»
بل پلو د افغانستان اسلامي امارت ویاند ذبیح الله مجاهد بیا وايي، وروستي بریدونه په یوه قوم او سمت پورې باید ونه تړل شي او پر وینا یې ځینې کړۍ غواړي،پر کوردننه د قومونو ترمنځ یووالی لمنځه یوسي.
غوښتنې دا دی، چې په افغانستان کې دې یووالي او یو ملت جوړونې ته کار وشي او هغه بهرنیو کړیو پر وړاندې دې کلکه مبارزه وشي،چې په افغانستان کې تفرقې او تبعیض ته لمن وهي.
