Skip to content
د ملګرو ملتونوعمومي سرمنشي انټونیو ګوترش یو ځل بیا افغانستان کې د نجونو ښوونځیو په تړلي پاتې کیدو اندېښنه ښودلې او ټینګار یې کړی،چې افغانستان پر زده کړو سمبال نجونو ته اړتیا لري.
دغه راز ګوترش یو ځل بیا پر اسلامي امارت غږ وکړ،چې نجونو ته د زده کړو اجازه ورکړي.
هغه زیاته کړې:« افغانستان کې له ښوونځیو په دوامداره ډول د نجونو پر اېستلو ډېر اندېښمن یم. دا کار افغان نجونو او دغه هېواد ته خورا ډېر زیان رسوي،په داسې حال کې چې دوی انرژي او کار ته اړتیا لري. زه یو ځل بیا له طالبانو غواړم،چې نجونې زده کړو ته پریږدي.»
په ورته وخت کې پخواني ولسمشر حامد کرزي هم له اوسني سرپرست حکومت غوښتي،چې د نجونو پر وړاندې د ښوونځیو دروازې پرانیزي،ترڅو د هېواد د روښانه راتلونکې لپاره کار وکړي.
کرزي زیاته کړه:« د ګران هېواد د دردونو رغول یوازې د زده کړې او پوهې له لارې ممکن ده.د هېواد له ټولو نجونو غواړم،چې په قوي اراده او نه ستړې کېدونکوهڅو زده کړې وکړي،د علم عالي درجاتو ته ځان ورسوي او له دغې لارې خپلو خلکو ته د خدمت جوګه او د ویاړ لامل شي. همدا راز یو ځل بیا د اسلامي امارت پر سرپرست حکومت غږ کوم،چې ژر تر ژره په ټول هېواد کې د نجونو متوسطه او لېسې پرانیزي،تر څو افغانستان د روښانه راتلونکې خاوند او د نړۍ سیال شي.»
اخوا د افغانستان لپاره د اروپایي ټولنې ځانګړي استازي توماس نیکلاسن یادونه وکړه، چې حکومت دې نجونو ته د زده کړو زمینه برابره کړي، ځکه د نن ورځې زده کوونکي د سبا ورځې خدمتګاران دي.
نیکلاسن زیاتوي:« په ټول افغانستان کې باید ښوونځي پرانېستل شي،ترڅو د ټول عمر لرونکې نجونې وکولی شي، زده کړو ته لاس رسی پیدا کړي.»
بل لورته د افغان ښځو او د بشر حقونو لپاره د امریکا ځانګړې استازې رینا امیري ویلي، اوسنی حکومت د نجونو او ښځو حقونو ته له درناوي پرته پر رسمیت نه شي پیژندلی او زده کړه یې د افغانستان د پرمختګ لپاره یوازینۍ لاره وبلله.
هغې زیاته کړه:« طالبان باید په یاد ولري، د ټولو افغانانو او په ځانګړي ډول د نجونو د زده کړو حق ته له درناوي پرته د نړیوالې ټولنې مشروع غړي کېدو او د پرمختګ لپاره بله هېڅ لاره نه شته. دا په افغانستان کې د هر ډول پرمختګ بنسټ دی.»
دا په داسې حال کې ده،چې وړمه ورځ د کوچنیو نجونو نړیواله ورځ وه، خو په افغانستان کې له دغې ورځې داسې مهال یادونه وشوه،چې له یوه کال راپدیخوا د شااوخوا یونیم میلیون نجونو پرمخ ښوونځي تړل شوي او له شپږم ټولګي پورته نجونې ښوونځيو ته د تګ اجازه نه لري.
