Skip to content
پکتیا ولایت کې د چرګانو یو شمېر فارم لرونکي وايي، له اسلامي امارته غواړي،چې دغه ولایت ته دې د پاکستاني چرګانو پر واردېدو بندیز ولګوي.
دوی وايي،پکتیا کې د چرګانو لسګونه فارمونه شته،چې کولی شي ټولو سیمو ته چرګان ورسوي،خو اوس یې بازار کې ځای پاکستاني چرګانو نیولی دی.
د چرګانو یو تن فارم لرونکی وايي:«دا چرګان چې کله ورسېږي، بیا پاکستاني چرګان پسې رارسېږي. د اسلامي امارت له مشرانو مو غوښتنه دا ده،چې پاکستاني چرګان بند کړي. تاسو ګورئ،موږ له ستونزو سره مخ یو.»
د چرګانو فارم لرونکي همدا راز وایي، بازار کې د پاکستاني چرګانو موجودیت یې روزګار خراب کړی دی.
د چرګانو یو تن فارم لرونکی وايي:«موږ اړ یو،چې چرګان مو پر کمه پیه وپلورو، ځکه د دانې اخېستلو توان نه لرو. »
د پکتیا کرنې او مالدارۍ ریاست مسوولین بیا وايي، دغه ولایت کې شته فارمونه دومره تولید نه لري،چې ټول ولایت ته بسنه وکړي او له همدې کبله یې بازارونو کې پاکستاني چرګانو ته د خرڅلاو اجازه ورکړې.
د کرنې او مالدارې ریاست استازی حسین خیل وايي:« د پکتیا ولایت نفوس زیات دی،نسبت د فارمونو شمېر ته. دلته تقاضا زیاته ده او عرضه کمه ده، نو موږ اړ یو،چې د نورو ولایتونو او همدارنګه د ګاونډیو هېوادونو تجارانو ته اجازه ورکړو.»
د چرګانو فارم لرونکي وايي، پکتیا کې د چرګانو ۵۰ لوی او واړه فارمونه شته او که کرنې ریاست یې ملاتړ وکړي او پر پاکستاني چرګانو بندیز ولګوي، لنډه موده کې به یې شمیر زیات کړي.
