د خوست لکڼو اړوند کمر سر سیمه کې د ملي یووالي په موخه دغو جوړو شویو سیالیو کې چې د جمعې په مازیګر پای ته ورسېدې، د خوست له بېلابېلو سیمو۳۰ لوبډلو ګډون کړی و.
د سیالیو تنظیموونکي وایي، له یادو لوبو یې د ځوانانو سالم مصروفیت او په لرو پرتو سیمو کې د کرکټ د تکړه لوبغاړو موندل له مهمو موخو څخه وو.
د خوست اطلاعاتو او کولتور رییس، محمد صابر صابري وايي: « زده کړې وکړئ، له ځانه ښه ډاکټران او انجینران جوړ کړئ، ښه ژورنالېستان او ښوونکي شئ. زه له تاسو غواړم چې له نشه يي توکو ځان وساتئ او په دې تړاو کلکه مبارزه وکړئ.»
د سیالیو جوړونکی، شریف خان پښتونیار وايي: « زموږ موخه دا وه چې ځوانانو ته ذهني تفرېح جوړه شي او ځوانان د نشه يي توکو له کارولو څخه را وګرځي.»
لوبغاړي او سیمه ییز اوسېدونکي وایي، د ورته سیالیو دوام کولی شي د ځوانانو د ورزشي وړتیاوو په لوړولو کې مرسته وکړي.
دوی له اړوندو ادارو غواړي چې په لرو پرتو سیمو کې د استعدادونو موندنې ته لا ډېره پاملرنه وکړي، ترڅو تکړه لوبغاړي د پرمختګ لپاره سترو سیالیو ته لار پیدا کړي.
لوبغاړي عرفات عادل وايي: « دا ډول سیالۍ د ځوانانو لپاره ډېر ښه فرصت دی، دلته ډېر ښه لوبغاړي موندل کېږي، ولایتي ټیمونه او کرېکټ بورډ باید پاملرنه ورته وکړي.»
د لکڼو اوسېدونکی، قدیر الله لکڼوال وايي: « دلته له هرځای څخه ښه لوبغاړي او استعدادونه راغلي، له دوی ښه زده کړه کېدای شي.»
خوست کې د سیمه ییزو کرېکټ سیالیو د زیاتېدو ترڅنګ، په وروستیو کلونو کې یو شمېر دا ډول سیالیو سوداګریزه بڼه هم غوره کړې ده چې د همدې لوبې د غوړېدا ترڅنګ یې د لوبغاړو او د لوبو د نورو اړوندو کسانو لپاره د عاید زمینه رامنځته کړې ده.
