Skip to content
وال سټرېټ ژورنال امریکې نشریې په خپل تازه راپور کې، د هغو لوړ پوړو پخواني افغان چارواکو او سیاسیونو شتمنیو په اړه خپل راپور کې یادونه کړې،چې د جمهوریت له پرځېدو سره سم یې هېواد پرېښود او اوس یې په اروپا، امریکامتحده ایالت او عربي هېوادونو کې ګرانبیه ځایونو کې کورونه اخیستي او خپلو کورنیو سره اوسي.
د راپور یوه برخه :« د جمهوریت دورې د ملي امنیت شورا سلاکار حمدالله محب چې د بریټانیا او مېرمنې یې د امریکا متحده ایالتو تابیعت درلود، د جمهوریت سقوط سره سم له خپلې کورنۍ سره په شرینګي لا هوټل کې میشت شو، چې لګښت یې د متحده عرب اماراتو دولت ورکاوه، خو اوس د امریکا متحده ایالتو په فلوریدا ایالت کې د سمندر پر غاړه یو ګرانبیه مجلل کور کې اوسېږي.»
د تیر حکومت د مالیې وزیر اکلیل حکیمي،چې د نظام له سقوط شااوخوا دوه کاله وړاندې یې استعفاء ورکړې وه، په اړه یې وال سټریت ژورنال په خپل راپور کې داسې لیکلي.
د راپور یوه برخه:« د مالیې پخوانی وزیر اکلیل حکیمي له افغانستانه د وتلو مخکې او وروسته د امریکا متحده ایالتو په کلفورنیا ایالت کې ۱۰ بابه کورونه اخېستي دي،چې یو کور یې په قیمتي ځای کې دی، چې ارزښت یې نږدې ۲.۵ میلیونه ډالره دی.»
د تیرحکومت د مالیې یو بل پخوانی وزیر خالد پاینده،چې په ځينو نړیوالو رسنیو کې یې د اقتصادي وضیعت په اړه داسې راپورونه خپاره شول،چې ګواکې اوس ټکسي چلولو ته اړ شوی، د وال سټریټ ژورنال راپور کې یې په تړاو ویل شوي،چې پاینده د امریکامتحده ایالتو په واشنګټن کې دوه کورونه لري، چې یو کور یې په نغدو پیسو اخېستی دی.
د راپور یوه برخه:«د مالیې پخوانی وزیر خالد پاینده،چې مخکې یې امریکامتحده ایالتو کې د موټر چلولو راپورونه ورکړل شوي وو، د امریکا متحده ایالتو په واشنګټن کې یې دوه کورونه اخیستي، چې یو کور یې په یو میلیون نغدو ډالرو رانیولی دی.»
په دغه راپور کې د اقتصاد پخواني وزیر مصطفی مستور په اړه راغلي، چې دوبۍ کې کور لري،خو اوس د ترکیې په استانبول ښار کې اوسېږي.
د راپور یوه برخه:«د اشرف غني د دورې د اقتصاد وزیر مصطفی مستور بیا د وزیر کېدو پر مهال د دوبۍ په مرینا نومې سیمه کې کور اخیستی دی،خو د نظم له سقوط څو میاشتې وړاندې ترکيې ته تللی او د استانبول په ښار کې میشت دی.»
د بلخ پخوانی والي او د جمیعت ګوند اجرائیه مشر عطاء محمد نور په اړه راپور کې ویل شوي،چې د متحده عرب اماراتو په یو داسې ځای کې اوسېږي،چې ان دغې سیمې ته عام خلک د داخلیدو اجازه نه لري.
د راپور یوه برخه:« د بلخ پخوانی والي او د جمیعت ګوند اجرائیه مشر عطاء محمد نور له سقوط وروسته د متحده عرب اماراتو په نخل نومې قیمت ترینه ځای کې اوسېږي، چې ان د عامو خلکو ورتلل هلته ستونزمن دي.»
دغه راز د ولسمشرۍ د پخواني لومړي مرستیال عبدالرشید دوستم په اړه راپور کې ویل شوي،چې د ترکیې پلازمېنې انقرې په یوه ګرانبیه سیمه کې کور لري، خو مالومه نه ده،چې دا کور څه وخت اخېستل شوی دی.
خو پر کوردننه د سیاسي چارو یو شمېر شنونکي بیا په دې باور دي، چې جمهوریت د فساد له مله سقوط کړی او دغه راپور نه شي ردېدلی.
له دې وړاندې هم یو د شمیر پخواني سیاسیونو او چارواکو په تړاو د فساد ادعاوې او راپورونه خپاره شوي، خو تراوسه پورې تورنو کسانو د شویو ادعاوو په اړه کوم غبرګون نه دی ښودلی.
د جمهوریت له پرځيدو وروسته ادعاوې کېدې،چې پخواني ولسمشر محمد اشرف غني له ځانه سره میلیونه ډالره وړي، خو تیره اوونۍ سیګار په خپل راپور کې یادې ادعاوې رد کړې.
د وال سټریټ ژورنال دغه راپور ته یوازې د مالي پخواني وزیر خالد پاینده ځواب ورکړی او دا راپور یې بې اساسه بللی،خو نورو سیاسیونو یې په اړه څه نه دي ویلي.
