په سویل کې د پکتیا والي محمد علي جان احمد د یکشبنې پر ورځ د «۱۴۰۱ کال د غبرګولې پر ۱ مه» د اسلامي امارت د دویم امیر ملا اختر محمد منصور تلین په مناسبت جوړه شوې ناسته کې د وینا پر مهال وویل، اسلامي امارت د جمهوریت او امارت کونډو او یتمیانو ته په یوه سترګه ګوري او میاشتني امتیازات ورکوي.
احمد وایي،د شهیدانو،معلولینو چارو ریاست ته دنده سپارل شوې،چې د طالب، عسکر او جګړو کې د قرباني شویو ملکي وګړو کورنیو ته دې دغه میاشتني امتیازات اجراء کړي.
هغه زیاته کړه:« د شهیدانو او معلولینو چارو ریاست ته حکم شوی دی،چې هرې کونډې ته،هر یتیم ته به میاشتني امتیازات ورکوي، بغیر له توپیره،چې دا د عسکر، طالب او یا جګړه کې د قرباني شوي ولسي وګړي کونډې او یتیمان دي.»
د پکتیا امر بالمعروف رئیس مولوي شرف الدین له اسلامي امارته وغوښتل،چې تیرو کلونو کې خلکو د خپلو هجرو دروازې د دوی پر مخ پرانیستې وې او دوی دې ورته اوس د دفترونو دروازې پرانیستې وساتي.
هغه زیاته کړه:« له اسلامي امارت مو غوښتنه دا ده،چې دې ملت زموږ لپاره د خپلو هجرو دروازې پرانیستې وې، تاسو اوس ورته د دفترونو دروازې پرانېستې وساتئ. په کار ده، چې دفترونه یې پر مخ بند نه شي.»
د ناستې ویناوالو د اسلامي امارت د دویم امیرالمومنین ملا اختر محمد منصور په ژوند او د امریکا او ناټو پر وړاندې پر وسله واله مبارزه هم خبرې وکړې.
د پکتیا یو تن اوسېدونکی وايي:«کله چې د منصور د رهبرۍ دورې جریان مطالعه کوو،نو دا به منو،چې هغه یو پیاوړی رهبر وه. هغه په داسې ستونزمنو شرایطو کې د مرحوم امیرالمومنین ملا محمد عمر مجاهد دویم او بیا لومړی نائب شو،چې د مشر ملا محمد عمر مجاهد لومړی نایب ملا عبیدالله اخون لومړی زنداني او بیا شهید شوی وو.»
د پکتیا امر بالمعروف رئیس شرف الدین له خلکو وغوښتل،چې د اسلامي امارت حکم د اسلام حکم دی او دا دې په ځانګړي ډول د امر بالمعروف ادارې حکم نه ګڼي.
