په دغه ناسته کې د ګډونکوونکو هېوادونو اندیښنه دا وه،چې سیمې او نړۍ ته د ترهګرۍ او نشه یې توکو د قاچاق ګواښ زیات شوی دی.
په ناسته کې د پاکستان،ایران،تاجکستان،روسیې او هند اندیښنه ښودلې،چې هېوادونه یې د داعش له لوري له ګوښ سره مخ دي او باید مخه یې ونیول شي.
ناسته کې پرېکړه وشوه،چې اسلامي امارت دې د ښځو او بشري حقونو، ترهګرۍ سره د مبارزې او د ټول شموله حکومت د جوړېدو برخه کې جدي اقدام وکړي،چې نړۍ او سیمه یې په رسمیت وپیژني.
ددغو هېوادونو خبرداری داوه،که د ترهګرۍ ګواښ له دې هم زیات شي،نو نړۍ به اړه کړي،چې په دې تړاو خپل وروستی تصمیم ونیسي،چې بیابه نه د افغانستان او نه هم د سیمې پر ګټه وي.
د سیاسي چارو شنونکی سید بلال فاطمي وايي:« په ناسته کې دا نهايي تصامیم ونیول شول،چې اسلامي امارت څومره ژر کولای شي د ښځو او بشري حقوقو په مسله کې او ترهګرۍ سره د مبارزې مسله کې او همه شمول نظام په برخه کې ګړندي ګامونه واخلي. که غواړي چې سیمه او نړۍ یې په رسمیت وپیژني، دوی باید خپل تعاملات ګړندي کړي او که چیرې دا کار ونه کړي او ګاونډیانو ته ګواښ زیات شي،نو نړۍ به اړه شي،چې نهايي تصمیم ونیسي او هغه نهايي تصمیم به د اسلامي امارت پر ګټه نه یې او دا به د سیمې لپاره هم غوره نه وي.»
د سیاسي چارو شنونکي طارق فرهادي وايي:« د شانګهای په ناسته کې له ترکمنستان پرته د افغانستان نورو ټولو ګاونډیانو حضور درلود او دا ټول افغانستان له درېیو زاویو ګوري،یا ترهګرۍ یا کډوال او یاهم نشه یې توکي. موږ باید دا حالت بدل کړو،په افغانستان کې باید اصلاحات راوستل شي او حکومت کې عمیق اصلاحات راوستل شي.د دې لپاره چې حکومت وپیژندل شي،چې افغانستان له اقتصادي پلوه او له ګاونډیو سره د روابطو لپاره په یو مترقي هېواد بدل شي.»
د سیاسي چارو شنونکی سید بلال فاطمي وايي، اسلامي امارت له سیمې او نړۍ سره رسمي اړیکې نه لري او د هند په ناسته کې داسې تصامیم نه دي نیول شوي،چې د اسلامي امارت پر ګټه وي او دا ټولې د نړیوالو او ګاونډیو پلمې دي،چې د اسلامي امارت پر وړاندې مطرح شوي دي.
فاطمي زیاته کړه:« زه ګورم،د دې ناستې ګټې دومره زیاتې نه دي، د اسلامي امارت پر ګټه باندې کوم تصامیم نه دي نیول شوي، ټولې پلمې دي،د نړیوالو او ګاونډیانو له لوري اسلامي امارت ته.»
خو اسلامي امارت بیا وايي،د سیمې پر کچه ټولې هغه ناستې،چې د افغانستان په تړاو په کې بحث کیږي، مهمې دي او افغانستان له سیمې او ګاونډیو سره ښې ډیپلوماتیکې اړیکې لري.
د اسلامي امارت د ویاند مرستیال انعام الله سمنګانی وايي:« هغه ناستې،چې د سیمې پر کچه د افغانستان په تړاو جوړیږي، د افغانستان لپاره مهمې دي او هېله ښي،چې په داسې ناستو کې د افغانانو لپاره ګټور بحثونه وشي. اسلامي امارت له ډېرو هېوادونو او په تیره د سیمې او ګاونډیو هېوادونو سره ښې ډیپلوماتیکې اړیکې لري.»
د هند په نوي دهلي کې د شانګهای سازمان دغه ناسته،چې دافغانستان په تړاو په کې بحث شوی او اندیښنې مطرح شوي،د دغه سازمان د ترهګرۍ ضد کمیټې له لوري جوړه شوې وه،چې د روانې می میاشتې له ۱۶ تر ۱۹ نیټه یې دوام درلود.
