کارپوهان د انقرې دغه ناسته د افغانستان د ملي ګټو او تاریخ پرضد غونډه یادوي او پر وینا یې په دې ناسته کې هغه څیرې راټولې شوي دي،چې پر افغانستان د روس او امریکامتحده ایالتو دواړو د د یرغل ملاتړي ول.
دوی وايي، اسلامي امارت باید له ترکیې وغواړي،چې خپل هېواد کې دغه ډول ناستو ته اجازه ورنه کړي.
د سیاسي چارو کارپوه مختار هاتف وايي:« کومه غونډه چې په انقره کې جوړه شوې،دا د افغانستان د ملي ګټو ، ان د افغانستان ملي بشپړتیا او تاریخ پر ضد یوه ناسته ده. په دې کې هغه څیرې راټولې شوي،چې پرون یې دغه خاوره پر امریکا خرڅه کړه،په انقره کې جوړه شوې ناسته، په نامه د شورا عالي مقاومت د افغانستان د خلکو له لوري مردوده ده او اسلامي امارت باید له ترکیې وغواړي،چې داسې ناستو ته اجازه ورنه کړي .»
ځینې نور بیا په دې باور دي، چې دغه څیرې نور د افغانستان په سیاست او واکمنۍ کې ځای نه لري، د ملي ګټو پرځای یې تل ګوندي ګټو ته ترجیح ورکړې او نور د قومونو استازیتوب هم نه شي کولای.
د سیاسي چارو کارپوه یوسف امین ځاځی وايي:« کومې څیرې چې په ترکیه کې د دوستم په کور کې راټولې شوي، دوی ته نور د افغانستان په سیاست او خصوصآ په واکمنۍ کې نور ځای نه شته دی، هر قوم او ټول افغانان نور دوی نه مني،جګړې خلک ستړي کړي دي او چاته به د جګړې اجازه ورنه کړل شي.»
د سیاسي چارو کارپوه سیدبلال فاطمي وايي، داسې ناستې پایله نه لري،ځکه ګډونکو کې یې د افغانستان استازي نه دي،بلکې له قوم او مذهب نه په ګټې اخیستنې سره پیسې لاسته راوړي او شخصي ګټې پالي.
فاطمي زیاته کړه:« داسې ناستې نتیجه نه ورکوي او پایلې به یې منفي وي،ځکه دوی د افغانستان لپاره نه بلکې شخصي ګټو لپاره کار کوي، نه دافغانستان استازیتوب کوي او نه هم د خپلو قومونو، دا هغه څیرې دي،چې له همداسې پروژه یې کارونو پیسې لاسته راوړي.» \
د انقرې ناستې ګډونوالو ته بیا د اسلامي امارت توصیه داده،چې له اعلان شوې عمومي عفوې نه دې استفاده وکړي او بېرته دې خپل هېواد ته راستانه شي.
له هغې وروسته چې جمهوریت سقوط شو او اسلامي امارت په افغانستان واکمني ترلاسه کړ، عبدالرشید دوستم،عطامحمد نوراو د شمال ټوالې نورې هغه څیرې،چې تل د سولې مخالفې او پر جګړې یې ټینګار درلود، له افغانستانه وتښتیدې او اوس په انقره کې سره راټول شوي دي او د افغانستان په تړاو یې ناسته کړې.
