مجاهد زیاته کړه:«د پاکستان حکومت او د پاکستان د طالبانو د تحریک ترمنځ د اسلامي امارت په منځګړیتوب په کابل کې مذاکرات ترسره شول. د مذاکراتو په جریان کې په اړوندو موضوعاتو کې د پام وړ پرمختګ ترڅنګ په لنډمهاله اوربند هم هوکړه وشوه.»
له پاکستانه کابل ته د پاکستاني حکومت پلاوي راتګ که څه هم د دغه هېواد رسنۍ تائیدوي، خو د ترکیب او مشرۍ په تړاو یې تر دې دمه څه نه دي ویل شوي.
د پاکستان له چارو باخبره څېرې په دا ډول دوه اړخېزو خبرو کې د اسلامي امارت ونډه که څه هم په مثبته سترګه ګوري،خو ټینګار کوي،تر هغې چې د پاکستان حکومت او پاکستاني طالبان په خپلو دریځونو کې نرمښت ونه ښیي پایله نه ورکوي.
ازاد خبریال طاهر خان وايي:«د پاکستاني طالبانو او پاکستان حکومت ترمنځ د سولې خبرو دا پروسه به دومره آسانه نه وي،خو که دواړه خواوې په خپلو دریځونو کې نرمښت وښیي یوې پایلې ته رسیدلی شي. اسلامي امارت د دواړو خواوو ترمنځ د منځګړي او درېیمګړي رول ادا کولای شي،خو په ټوله کې دا د پاکستان حکومت اوپاکستاني طالبانو پورې تړلې موضوع ده،چې څنګه په کې پرمختګ وکړي.»
ځینې نور بیا وایي،د پاکستاني طالبانو او حکومت ترمنځ سوله د افغانستان پر وضعیت هیڅ اغیز نه لري او اسلامي امارت ته په کار ده،چې د دا ډول موضوعاتو پر ځای د خپلو کورنیو ستونزو پر حل تمرکز وکړي.
د پوځي چارو شنونکی توریالی ځاځی وايي:« د پاکستاني طالبانو او حکومت ترمنځ خبرې د افغانستان پر حالاتو هېڅ اغیز نه کوي،ځکه دوی زرګونه پښتانه په کوزه پښتونخوا کې وژلي دي،نو اسلامي امارت باید د دا ډول مسایلو پر ځای د هېواد دننه ستونزو د حل لپاره هڅې وکړي.»
ویل کیږي،د روانې اوونۍ په پیل کې د پاکستان حکومت سربېره د دغه هېواد وزیرستان، صوات او ملکنډ سیمو مشرانو او سپین ږیرو هم له پاکستاني طالبانو یا ټي ټي پي سره لیدلي دي او له هغوی یې د اوربند غوښتنه کړې ده.
سرچینو همداراز شمشاد ته تائید کړې ده،چې پاکستاني حکومت د پاکستاني طالبانو دوه مخکښ غړي هم خوشې کړي دي،خو یادې ډلې یې په تړاو تر دې دمه څه نه دي ویلي.
