یونېسف یو ځل بیا افغانستان کې د ماشومانو پر وضعیت اندېښنه ښودلې 

د ماشومانو لپاره د ملګرو ملتونو د ملاتړ صندوق یا یونېسف په افغانستان کې د ماشومانو پر وضعیت اندېښنه ښودلې او وايي،په دغه هېواد کې پر خوارځواکۍ د اخته ماشومانو شمېر نږدې دوه برابره زیات شوی دی.

د یونېسف په تازه راپور کې ویلي،چې نړۍ کې د ماشومانو خوارځواکي د بحران کچې ته نېږدې شوې ده.

په راپور کې وړاندې ویل شوي،چې په  افغانستان کې له ۲۰۱۸ زېږدیز کاله تر ننه، پر خوارځواکۍ د اخته ماشومانو شمېر نېږدې دوه برابره زیات شوی دی.

دغه راز په راپور کې ویل شوي،چې  کورونا وبا، اقلیمي بدلون او وسله والې شخړې د لا زیاتو ماشومانو د لوږې لامل شوي دي.

یونېسف بیا پر نړیوالو غږ کړی،چې پر خوارځواکۍ له اخته ماشومانو سره د مرستې په موخه دې بودیجه بېله کړي.