د ریاست الوزرا سیاسي مرستیال عبدالکبیر د ملګرو ملتونو له ځانګړي ریپورټر سره کتنه کړې

د افغانستان اسلامي امارت د ریاست الوزرا سیاسي مرستیال مولوي عبدالکبیر د سه شنبې پر ورځ د « ۱۴۰۱ کال د  غويي پر ۲۷» په کابل کې د ملګرو ملتونو له ځانګړي ریپورټر ریچارډ بینیټ سره لېدنه کړې.

په لېدنه کې دواړو لورو د افغانستان د روان وضعیت په تړاو خبرې کړې دي.

بېنیټ،چې تازه یې د اسلامي امارت له لوړپوړو چارواکو سره د لیدنو لړۍ پیل کړې، د بهرنیو چارو له سرپرست وزیر مولوي امیرخان متقي سره هم کتلي وو.

که څه هم د دغو ناستو ټول جزئیات رسنیو ته نه دي راوتلي،خو ویل کیږي،چې د افغانستان د روان سیاسي وضعیت،رسمیت پیژندنې او د بشر او ښځو حقونو د خوندیتوب په اړه خبرې اترې د دغو ناستو مهمې اجنډاوې ګڼل شوې دي.