د بهرنیو چارو سرپرست وزیر کابل کې د جاپان له سفیر سره کتلي 

د افغانستان اسلامي امارت د بهرنیو چارو وزارت سرپرست وزیر مولوي امیرخان متقي د سه شنبې پر ورځ د « ۱۴۰۱ کال د غويي پر ۲۷ مه» په کابل کې د جاپان له سفیر تاکاشي اوکادا سره کتلي.

په دې لیدنه کې د جاپان سفیر په افغانستان کې تر بل هر وخت امنیت د ډاډ وړ او له کورنیو عوایدو یې د نوي کال د بودیجې تصویب د افغانستان  اقتصادي پرمختګ وباله.

هغه د کرنې، ښوونې او نورو پراختیايي برخو کې د مرستو تر څنګ زیاته کړه،چې هېواد یې د افغانستان د اقتصادي ودې لپاره سلا مشورې کوي،چې په دې برخه کې اړین اقدامات ترسره کړي.

اخوا د بهرنیو چارو  سرپرست وزیر مولوي امیر خان متقي هېله څرګنده کړه،چې جاپان په افغانستان کې د نیمګړو پروژو په برخه کې مرستې تر سره کړي.

متقي زیاته کړې،چې اسلامي امارت د نشه يي توکو پر وړاندې کلکه مبارزه پیل کړې او د جاپان په ګډون یې باید نړیوال ملاتړ وکړي.

په ورته مهال د بهرنیو چارو سرپرست وزیر، د ملګروملتونو له ځانګړې استازې دیبورا لاینز سره هم کتلي او د افغانستان د روان وضعیت په اړه یې خبرې کړې دي.