د کاناډا، فرانسې، جرمني، ایټالیا، جاپان، بریتانیا، امریکا او د اروپایي ټولنې ځانګړي استازي افغانستان کې پر ښځو د مخ پر زیاتیدونکي محدودیتونه د اندېښنې وړ بللي دي.
د جي اووه هېوادونو د ګډې خبرپاڼې یوه برخه:«د جي اووه هېوادونو مشران د طالبانو له خوا د ښځو او نجونو پر حقونو او آزادیو محدودیتونه په کلکو ټکو غندي او مخالفت یې کوي. موږ د مساوي حقونو د غوښتنې برخه کې د افغانانو ترڅنګ ولاړ یو او له طالبانو غواړو،چې په دې برخه کې پر خپلو ژمنو ودریږي.»
جي اووه هېوادونو په خپله ګډه خبرپاڼه کې ویلي، افغانستان کې پر ښځو روان بندیزونه او محدودیتونه به د ټولنې نیمایي برخه له ټولو او مساوي حقونو بې برخې کړي.
په خبرپاڼه کې د اسلامي امارت له خوا پر ښځو بهر ته د تګ محدودیتونه او د ښځو ولیانو ته د سزا ورکولو پریکړې هم غندل شوي او له طالبانو بشر حقونو ته د ژمنتیا غوښتنه شوې ده.
د جي اووه هېوادونو د ګډې خبرپاڼې یوه برخه:« له دا ډول کړنو سره طالبان له نړیوالې ټولنې ځانونه لا منزوي کوي. موږ پر طالبانو غږ کوو،چې پر ښځو او نجونو لګیدلي بندیزونه لرې کړي او د ښځو ټول بشري حقونه خوندي کړي.»
د نړۍ دې سترو صنعتي هېوادونو ویلي، د سفر کولو او بیان آزادۍ ترڅنګ د ښځو لپاره ټولې آزادۍ په افغانستان کې د سولې او پرمختګ لپاره خورا اړینې ده او اړتیا ده،چې اسلامي امارت ورته ژمن پاتې شي.
اسلامي امارت له دې وړاندې په کراتو ویلي، پر ښځو یې بندیزونه هدف نه دی او د شریعت په رڼا کې د ښځو هر ډول آزادیو ته ژمن دي.
