د افغانستان او ایران ترمنځ پر ګډه سرحدي پوله د دواړو هېوادونو د پوله ساتو ترمنځ له نښتو او شخړو وروسته افغان او ایراني چارواکو په تایبا ښار کې مخامخ خبرې کړي.
افغانستان اسلامي امارت د ویاند مرستیال بلال کریمي وايي، په دغه ناسته کې د سرحدي ستونزو د حل ترڅنګ پر دې هم خبرې کیږي،چې څنګه کولای شي،چې دهغو کړیو هڅې شنډې کړي،چې غواړي له فرصت ګټه واخلي او د دواړو هیوادونو ترمنځ اړیکې خرابې شي.
کریمي زیاته کړه:« ایران ډېر مهم هېواد دی او لویه پوله له افغانستان سره لري او په دې وروستیو کې په محلي کچه چې کومې ستونزې رامنځ ته شوې،د حل او د دې لپاره چې د هغو فرصت طلبو افرادو،چې د دواړو ممالکو داړیکو دخړپړتیا لپاره هڅې کوي وخت ورنه کړل شي او دواړو هیوادونو په ګډه سره یوه ناسته کې چې هغه پیښې چې احتمال یې د پیښېدو دی، د دواړو هېوادونو ترمنځ باید مخه یې ونیول شي.»
کریمي وايي،نه یوازې له ایران سره بلکې له ټولو ګاونډیو سره د ستونزو په حل کې پر ګډ سیاسي تفاهم باور لري او هڅه کوي،چې ستونزې د خبرو له لارې حل شي.
کریمي زیاته کړه:«نه یوازې ایران بلکې اسلامي امارت پاکستان، تاجکستان،ازبکستان ترکمنستان او ټولو هغو هېوادونو سره د ښو اړیکو غوښتونکی دی،چې له افغانستان سره ګډه پوله لري او د سیاسي ستونزو د حل لپاره پر ګډ تفاهم باور لري.»
په ورته مهال د ایران ولسمشر د قطر له امیر سره د خبرو پر مهال په افغانستان کې په ټول شموله حکومت ټینګار کړی دی.
رییسي ویلي، افغانستان کې باید داسې حکومت رامنځته شي،چې پخواني ټول سیاسيون پهکې شامل او هغوی چې له افغانستانه وتلي دي، پراخه ونډه په کې ولري.
خو د سیاسي چارو تحلیل کوونکي بیا وايي،ایران د افغانانو لپاره ټول شموله حکومت غواړي،خو خپله یې په ایران کې د ۵۲ قومونو حق خوړلی دی او په حکومت کې یې ونډه نه لري.
دوی وايي،ایران غواړي،چې د ټول شموله حکومت له لارې تهران ته نږدې څیرې د افغانستان نظام ته داخلې کړي او د تهران ګټې خوندي وساتي.
د سیاسي چارو تحلیل کوونکی عزیز وايي:« دا عجیبه خبره ده،چې ایران په افغانستان کې ټول شموله حکومت غواړي،خو په ایران کې ۵۳ پنځوس قومونه ژوند کوي،هغوی په حکومت کې هېڅ ډول ونډه نه لري او یوازې همدا صفویان دي،چې واک یې په انحصار کې اخیستی دی،خو په افغانستان کې ایتلافي حکومت غواړي، د ایران هدف دادی،چې د ټول شموله حکومت په نوم خپل لاس پوڅي د افغانستان نظام ته داخلي کړي او د دوی ګټي خوندي وساتي.»
