د نوي ښوونیز کال له پیله پوره ۴۹ ورځې تېرېږي،خو لا هم د فشارونو او غبرګونونو سره اسلامي امارت هغه پرېکړه نه ده نهايي کړې،چې له شپږم ټولګي پورته د نجونو ښوونځيو د پیل لپاره یې ولس او نړیوال په تمه کړي دي.
په وروستیو څو اونیو کې د اسلامي امارت د لوړ پوړو چارواکو له خوا ولسونو ته ډاډ ورکړل شو،چې په نېږدې راتلونکې کې به د نجونو د ښوونځیو ستونزه حل شي، خو لا تر اوسه پورې کوم اقدام نه دی شوی
د افغان نجونو، ښځو او بشري حقونو لپاره د امریکا متحده ایالتو ځانګړې استازې رینا امیري یو ځل بیا له اسلامي امارته غوښتي،چې د نجونو زده کړو او ښځو ته د کار حق ورکړي.
امیري زیاته کړې:« زه د افغانانو او نړیوالې ټولنې له غوښتنو سره همغږې یمه،چې طالبان د ښځو پر وړاندې ظالمانه پرېکړې پای ته ورسوي. د نجونو ښوونځي بېرته پرانیزي، ښځو ته د کار اجازه ورکړي او پرېږدي،چې خپل ژوند بیا پیل کړي.»
د اسلامي امارت مسوولین بیا رسنیو سره په خبرو کې پر هغې پرېکړې او طرحې د کار خبره کوي،چې د رهبرۍ غړو او مشرتابه له خوا به د نجونو د ښوونځیو د بیا پرانېستلو په اړه جوړېږي.
د سیاسي چارو شنونکی کمال سادات وايي:« د نجونو ښوونځيو د دروازو تړل له نړیوالې ټولنې سره د دروازو د تړلو په مانا دي. هغه غوښتني،چې د ښوونځیو د بیا پیل لپاره کېږي، دا هم د افغانانو غوښتنې دي او هم د نړیوالې ټولنې، که ونه منل شي، نو بیا به دا نیمه پرانېستې دروازې هم د نړیوالې ټولنې سره وړتړل شي. دا مساله هم په سیاسي، اقتصادي او هم د رسمیت پر پېژندلو به اغېزې وکړي.»
د افغانستان اسلامي امارت پوهنې وزارت وايي، له شپږم ټولګي پورته د ټولو نجونو پرمخ د ښوونځيو په تړاو سلا شورې روانې دي او دوی د مشرتابه پریکړې ته په تمه دي.
دا چې اسلامي امارت به د نجونو د ښوونځیو پر پرانېستلو کله د افغانانو او نړیوالو اندېښنې ځواب کړي، لا مالومه نه ده.
