Skip to content
د اپرېل څلورمه نېټه د ماين له خطرونو دعامه پوهاوي نړیواله ورځ ده،که څه هم له دې نېټې دوه ورځې تیرې شوي، خو د چهارشنبې پر ورځ ډ «۱۴۰۱ کال د وري پر ۱۷ مه» په تړاو یې غونډه رابلل شوې.
پېښو ته د رسېدو په چارو کې د دولت وزارت د تطهیر او انسجام رئیس نورالدین رستم خېل د ماين پاکۍ نړيوالې ورځې په مناسبت جوړې شوې ناسته کې د وینا پر مهال وویل، په تېرو درې لسیزو کې د افغانستان درې زره کیلو مټره مربع ځمکه د ماینونو له ګواښه پاکه شوې،خو په خبره یې لاهم ګواښ شته دی.
رستم خېل زیاته کړه:« په تېرو ۳۰ کالونو کې د ماین پاکۍ پروګرام شااوخوا ۳۱۹۶ کلي پاک کړي دي،چې ۳۳۲۳ کیلومتره مربع مساحت لري او لاهم ۶۰۶ کیلو متره مربع ککړې سیمې،چې په ماینونو ککړې دي، ملي ډیټابیس کې ثبت دي او د ماینونو پاک کولو ته اړتیا لري. د افغانستان د ماین پاکي پروګرام یو بشپړ بشري او غیر سیاسي پروګرام دی،چې له پیله تر اوسه پورې یې د مرستندویه ادارو په مالي مرسته ۱۲۶۰۵۵۰ د پروسونل ضد مایونونه، ۶۱۳۹۸ د وسایطو ضد ماینونه، ۱۸۳۵۱۴۲۲ ناچاوده توکي او ۱۲۶۴په لاس جوړ شوي چاودېدونکي توکي کشف او شنډ کړي دي.»
د ياد وزارت سرپرست ملا محمد عباس اخوند وویل، له شته امنیتي فرصته په استفادې دې د ماين پاکۍ موسسې هغه سیمې له ګواښونو پاکې کړي،چې اوږدې جګړې په کې تیرې شوي او د ماین ګواښونه په کې شته دي.
اخوند زیاته کړه:« له نورو بریاو او ګټو سره سره یې یوه ګټه دا وکړه،چې خلکو ته زمینه سازي وشوه،چې د ماین پاکۍ برخه کې په ډاډه زړه سره کار وکړي. دغه راز خپله د ماین پاکانو لپاره هېڅ ډول ګواښ متوجه نه دی، په هره سیمه کې چې دوی وغواړي، کار وکړي، کار کولای شي.»
د ماين پاکۍ موسسو ځينو غړو له موسساتو د همکارۍ،خو هغه ماين پاکانو،چې دې برخه کې معلول او زيانمن شوي له نړیوالو نه یې د دوامداره مرستو غوښتنه وکړه.
د ماين پاکۍ موسسې رئیس محمد شريف یعقوبي وايي:« د ماین پاکۍ موسسو په استازيتوب غوښتنه کوم،له دواړو اړخونو هم د اسلامي امارت له دولته،چې د ماین پاکي پوره ملاتړ وکړي، لکه څنګه چې په الفاظو کې هم وویل شول، همدا شان یې ترې غواړو. له دوی مې یو ځل بیا دا غوښتنه ده،چې خپلو مرستو ته دوام ورکړي. له پخوا اوس ښه وخت دی، امنیت تامین دی، هرې هغې سیمې ته چې پخوا مو رسېدنه نه شوای کولای، امنیتي ستونزې وې، یا هم خپله دونران پر دې وېرېدل،که دلته ولاړ شو، خدای مه کړه، د ماین پاک د وژنې لامل نه شي، یا یوه بله پېښه رامنځته نه شي. نن هغه څه نه شته دی. »
د دغه وزارت د مالوماتو له مخې،اوس مهال د هېواد په شل ولایتونو او ۷ زونونو کې د ماین پاکۍ موسسو له لورې د ماین پاکولو چارې پیل شوي،تر څو په ماينونو ککړې سيمې پاکې کړي.
افغانستان کې له تېرو ۳۰ کلونو راهیسې څه باندې زر ماين پاکانو خپل ژوند له لاسه ورکړی دی،خو تر دې ور اخوا بيا هره میاشت په هېواد کې ۱۲۰ عام کسان د ماینونو له امله قرباني کیږي.
