Skip to content
د اروپا د مسلمانانو ټولنې مشرې ایوان ریډلي او د انګلستان الخير خيريه بنسټ رئیس په کابل کې د پوهنې سرپرست وزير سره ليدلي دي.
په دغه ليدنه کې د اروپا مسلمانانو د ټولنې مشر ايوان ريډلي د افغانستان ښونيز بهير سره د هر اړخيزو همکاريو او ملاتړ ژمنه وکړه.
د افغانستان اسلامي امارت د پوهنې وزارت ویاند عزیز احمد ریان وايي،ايوان په دې ليدنه کې له اسلامي امارته وغوښتل،چې له ۶ ټولګي پورته د نجونو د ښوونځيو بنديدو په پريکړه دې غور وکړي، ښوونځي دې پرانيزي او نجونو ته دې له زده کړو سربېره د کار کولو حق هم ورکړل شي.
ریان زیاتوي:« په ټوله کې پر دوو مسایلو بحث وشو. اوله موضوع په ټولنه کې د مېرمنو د کار او همدارنګه د زده کړو حق په اړه وه. د پوهنې سرپرست وزیر په خپلو څرګندونو کې وویل،چې اسلامي امارت د شریعت په چوکاټ کې او د شریعت په حدودو کې د مېرمنو ټولو حقوقو او په ځانګړي ډول د زده کړو او همدرانګه د کار حق ته ژمن دی. په دې برخه کې اسلامي امارت پوره جدید کوي،چې د مېرمنو لپاره د کار او زده کړو اسانه او مصون شرایط برابر کړي.»
په ياده کتنه کې د انګلستان الخیر خيريه بنسټ مشر بیا په افغانستان کې د ښوونځیو او مدرسو جوړولو ژمنه وکړه.
ریان وايي، د پوهنې سرپرست وزير راغلې پلاوي ته ډاډ ورکړ،چې دوی د اسلامي شريعت په چوکاټ کې د نجونو زده کړو او حقونو ته ژمن دي.
هغه زیاته کړه:« همدارنګه اغلې مریم وړاندېز درلود،چې دا غواړي، چې د افغانستان د پوهنې برخې سره همکاري وکړي، د افغانستان ولایتونو ته سفرونه ولري. نو د پوهنې سرپرست وزیر هم د نوموړې له دغه نیک وړاندیزه مننه وکړه او ورته یې وویل، د تاسو سفرونو برابره ولو په برخه کې، د پوهنې په ډګر کې د ستاسو خدمت لپاره به زمینه برابرو. »
اخوا د سیاسي چارو تحليل کوونکې دا ډول کتنې له ارزښت خالي نه ګنې او له اسلامي امارته غواړي،چې د نړيوال مشروعيت لپاره بايد د افغان نجونو حقونو او زده کړو ته درناوی وکړي.
د سیاسي چارو شنونکی ډاکټر حکمت حکمت وايي:« په کور دننه دیني علماء،په سیمه کې او نړۍ کې پر دې اجماع ده،چې د نجونو ښوونځي دي، لکه په ټوله اسلامي نړۍ کې ،چې د اسلامي شریعت له احکامو سره سم خلاص دي، باید په افغانستان کې هم د نجونو ښوونځي پرانېستل شي، ترڅو اسلامي امارت پر نړیواله کچه له هغو نیوکو خلاص شي،کوم چې په حقیقت د اسلامي امارت مشروعیت لپاره رامنځته شوي دي.»
د اسلامي امارت په راتګ سره پوره دوه سوه ورځې کيږي،چې له ۶ ټولګي پورته د نجونو پرمخ د ښوونځيو دروازې تړلې پاتې دي.
د نوې تعليمي کال پيل سره پر کوردننه د ښوونځیو خلاصيدو ته تمې ډېرې وي،خو اسلامې امارت په وروستۍ پريکړه کې له شپږم ټولګي پورته ښوونځې بیا تر امرثانې بند کړل.
