Skip to content
ګالپ نشریې په خپله تازه خپره شوې څېړنه کې ویلي،په منځنۍ کچه ۵۳ سلنه افغانان،چې د افغانستان له نیمايي زیات وګړي جوړېږي،پر افغانستان د اسلامي امارت له واکمن کېدو وروسته د تېر په پرتله په زیاته اندازه په دې کوښښ او فکر کې دي،چې هېواد پرېږدي.
څېړنه کې ویل شوي، افغانان د اقتصادي، پر دوی له محدویتونو او نورو ستونزو له امله د دې غوښتونکي دي،چې له افغانستانه ووځي او اروپا ته کډوال شي،چې د ۲۰۱۸ زېږدیز کال پرتله په کې درې سلنه زیاتوالی راغلی دی.
ګالپ نشریې د راپور یوه برخه:« اوس مهال په بالقوه توګه زیات افغانان غواړي،چې خپل هېواد پرېږدي،ځکه چې د طالبانو په حاکمیت سره میلیونونه خلک په دغه هېواد کې له لوږې او غربت سره مخ دي. پر اوکراین د روسیې له برید وروسته په زیاته اندازه اوکرایني وګړي له دغه هېواده وځي، چې دغې پېښې له افغانستانه د نړۍ پام اړولی او افغان کډوال له هېرېدو سره مخامخ دي.»
بل خوا د افغانستان اسلامي امارت د ویاند مرسیتال بلال کریمي بیا د یادې نشریې راپور بې بنسټه بولي او وايي، د افواهاتو پر بنسټ یې خپور کړی دی.
کریمي زیاتوي:« دا ډول راپورونه او په ځانګړي ډول دا راپور چې نشر شوی دی، زموږ په نظر د ناسمو مالوماتو پر بنسټ او یا هم یو پروپاګند په توګه نشر شوی دی.»
د چارو یو شمېر شنونکي بیا وايي،نړۍ د افغانانو اوسنۍ کډوالۍ ته سیاسي رنګ ورکوي.
دوی په دې باور دي،چې ناقانونه کډوالي د هېواد په سیاسي او ټولنیز بهیر بده اغېزه لري او اسلامي امارت دې د شته ستونزو حل ته لار پیدا کړي،تر څو د ناقانونه کډوالۍ مخنیوی وشي.
د سیاسي چارو شنونکی بلال فطمي وايي:« د افغانستان کډوالۍ ته اوس سیاسي بڼه ورکړل شوې ده. دا داسې ښودل کېږي،چې د طالبانو له راتګ وروسته کډوالي زیاته شوې ده.»
په ورته مهال بهرمېشتي او په کور دننه افغانان وايي،ډېری کورنۍ او ځوانان د اقتصادي ستونزو او وضع شویو محدودیتونو له امله اړ کېږي،چې هېواد پرېږدي.
په ترکیه کې افغان کډوال عرفان حسن وايي:« متاسفانه خلک ځورول کېږي. متاسفانه زموږ خبریالان او د بیان ازادۍ پلویان نیول کېږي. دوی په یو نه یو ډول ځورول کېږي.»
اسلامي امارت وايي، اقتصادي ستونزې لنډمهالې دي او هڅه کوي،چې شته ستونزې حل او د ناقانونه کډوالۍ مخنیوی وکړي.
د اسلامي امارت مرستیال ویاند بلال کریمي وايي:« په مجموع کې موږ د دې غوښتونکي یو،چې هېوادوال په هېواد کې پاتې شي،ځکه امنیت تامین دی. د ژوند کولو زمینه برابره ده. که اقتصادي ستونزې دي یا هم نورې ستونزې، دا لنډمهاله دي. هېله مندي شته دی،چې هغه هم حل شي.»
واک ته د اسلامي امارت له رسېدو سره سم له هېواده په سلګونه زره افغان کډوال کاونډیو او اروپايي هېوادونو ته روان دي،چې د تېرو کلنو پرتله په کې د پام وړ زیاتوالی راغلی دی.
باور دا دی،که په کور دننه د کاري فرصتونو نشتوالی، د ښوونیز بهیر تړل، اقتصادي او ګڼې نورې شته ستونزې ناحله پاتې وي، لرې نه ده،چې د کډوالۍ دغه شمېر نور هم زیات شي.
