د افغانستان اسلامي امارت بهرنیو چارو سرپرست وزیر امیر خان متقي چین کې له رسنیو سره په خبرو کې د افغانستان په تړاو د چین په کوربتوب د ګاونډیو هېوادونو بهرنیو چارو وزیرانو ناسته مهمه یاده کړه او زیاته یې کړه،چې چین د اسلامي امارت له خوا افغان سفارت ته استول شوي،ډیپلوماتان منلي دي.
متقي وايي،د چین وروستي اقدامات د افغانستان پر وړاندې د دغه هېواد پر ښه نیت دلالت کوي.
متقي زیاته کړه:« مننه کوم، چې د افغانستان محصولاتو ته یې چین ته د لېږد زمینه برابره کړې. چین کې د افغانستان سفارت کې زموږ ډيپلوماتان منلي دي. دا ټولې هغه هڅې دي،چې د چین پر ښه نیت دلالت کوي. »
امیر خان متقي وايي، هېواد کې د شل کلنې جګړې له پای وروسته د بیا رغونې او اقتصادي ودې زمینه برابره شوې ده او په مرسته به یې افغانستان پر اقتصادي مرکز او د سویلي او مرکزي آسیا هېوادونو پر وصل نقطې بدل شي.
په ورته وخت کې متقي وايي، سیاست یې متوازن او پر اقتصاد متمرکز هغه دی او موخه یې له ټولو هېوادونو سره د مثتبو اړیکو پالل دي.
هغه زیاتوي:« د افغانستان اوسنی حکومت د تېرو حکومتونو خلاف د نړۍ له ټولو هېوادونو سره مثبتې اړېکې غواړي. موږ یو اقتصاد محوره او متوازن سیاست غوره کړی دی، د هغې په رڼا کې نه غواړو،چې افغانستان یو ځل بیا د نړیوالو قوتونو د ټکر مرکز شي، یا دې په سیمه کې له ځېنو هېوادونو سره په ټکر کې راشي.»
د هېواد بهرنیو چارو سرپرست وزیر د داعش وسله والې ډلې په تړاو وویل،د امریکا متحده ایالتو له خپل شل کلن حضور سربېره یې هم دلته تحرکات درلودل،خو دوی د خپلې واکمنۍ په لومړیو څلورو میاشتو کې دا ډله له منځه یوړه.
متقي وايي، هېواد یې له ژمنې سره سم د نورو لپاره ګواښ نه دی.
هغه زیاته کړه:«افغانستان د نړۍ هېڅ یوه هېواد ته ګواښ نه دی. د افغانستان خاوره اوس هېڅوک د هېچ چا پر ضد نه شي کارولی. افغانستان کې اوس امن دی. له ټولو سره مثبتې اړیکې غواړي. پر نړیوالو هم زموږ حق جوړېږي،چې له افغانانو سره مرسته وکړي.»
امیر خان متقي نېوکه وکړه،چې په تېروشلو کلونو کې افغانستان کې هېڅ ډول پرمختګ نه دی شوی او دوی لا هم په هېواد کې معیاري روغتونونونه او سړکونه نه لري.
هغه له نړیوالو وغوښتل،چې افغانستان خپل آرام ژوند ته پریږدي او له دوی سره په ټولو برخو کې مرستې وکړي.
