بایډن ته د ټرمپ وړاندیز؛ بېرته افغانستان ته ولاړ شئ او خپل مالکیت راټول کړئ 

د امریکا متحده ایالتو پخواني ولسمشر ډونالډ ټرمپ د دغه هېواد پر اوسني ولسمشر جو بایډن تور پورې کړی دی،چې په د میلیاردونو ډالرو پر ارزښت وسله یې په افغانستان کې پرېښې ده.

 ټرمپ اوسني  ولسمشر بایډن ته وړاندیز کړی دی، چې افغانستان ته دې ولاړ شي او خپل ملکیت دې را وباسي.

اخوا د سیاسي چارو شنوونکي د امریکايي مشرانو دغه ډول څرګندونې د هغوی ګوندي اختلافات بولي او په خبره یې امریکا له خپلو وتلو وړاندې مهمه وسله واېستلې وه.

د سیاسي چارو  شنونکی طارق فرهادي وايي:« د  ټرمپ دغه خبرې له بایډن سره د رقابت په خاطر دي،چې په ۲۰۲۴ کال ټاکنو کې د هغه تېروتنې او خلا ګانې خلکو ته وښيي،ځکه امریکا له خپلو وتلو وړاندې خپلې چورلکې او مهم تجهیزات اېستلي او دغو ماتو ګوډو هاموې ګانو پسې نه راځي.» 

یو شمیر نور هم د مخکیني ولسمشر ډونالډ ټرمپ دغه خبرې له بایډن د غچ اخېستلو په مانا بولي او وايي تر دې پورته هیڅ ارزښت نه لري.

د سیاسي چارو شنونکی توریالی ځاځی وايي:« ټرمپ له پوتین سره نږدې اړیکي لري او د امریکا د خلکو لپاره نه منل شوې څېره ده، نو دا څرګندونې یې له بایډن د غچ اخیستو لپاره دي،چې په نړیواله کچه ترې خپل غچ اخېستل غواړي، نو امریکا له اقتصادي ستونزو سره مخ ده او دا کار هیڅکله نه کوي.»

ټرمپ په دغو خبرو کې بایډن په دې ډول یاد کړ،چې پخپلو کارونو او پلانونو نه پوهیږي،چې څه ډول یې مخ ته یوسي.

شنونکي بیا وايي،  د ټرمپ دغه څرګندونې د کورني مصلحت لپاره دي او په افغانستان اغیز نه شي لرلی.

د سیاسي چارو شنونکی حبیب الله جانبدار وايي:« د ټرمپ څرګندونې د داخلي سیاسي مصلحت لپاره ویل شوي دي. بهرنی اغیز نه شي درلودی، صرف یوه تبلیغاتي بڼه لري او د هغوی داخلي کړکیچ دغه حالت ته رسیدلی ،چې یو بل ته بهانې ګوري.» 

خو په افغانستان کې د تېر نظام تر سقوط څو ورځې وړاندې او څو ورځې وروسته هم د امریکايي ځواکونو له لوري زرګونه تجهیزات واېستل شول او د اګسټ میاشتې تر ۳۰ نیټې دغې لړۍ دوام درلود.