د جرمني لوړ پوړو چارواکو اعلان کړی چې هڅه کوي د روان کال تر پایه له پاکستانه هغه ټول افغان پناهغوښتونکي خپل هېواد ته ولېږدوي چې په ياد هېواد کې جرمني د لېږد په تمه دي.
د دې هېواد بهرنیو چارو وزیر ویلي، اوسمهال په پاکستان کې د افغان کډوالو وضعیت خورا سخت دی او هڅه کوي چې پر وخت رسېدنه ورته وکړي. د نوموړي په خبره، د جرمني لپاره د افغان پناهغوښتونکو لېږدول، لومړیتوب دی.
د جرمني بهرنیو چارو وزیر یوهان واډیفول ویلي: « موږ هڅه کوو د روان کال تر پایه د افغان پناهغوښتونکو لېږد پروسه بشپړه کړو. هغوی هلته له خورا ناوړه وضعیت سره مخ دي. موږ هڅه کوو دوی ته پر وخت رسېدنه وشي، د جرمني حکومت لپاره د افغان پناهغوښتونکو لېږد لومړیتوب لري. په روښانه ټکو باید ووایم، لازمې څېړنې او همداراز الوتنې اوس په چټکۍ سره ترسره کېږي.»
کابو میاشت وړاندې د جرمني بهرنیو چارو وزارت ویلي و چې له پاکستاني لوري سره یې خبرې کړې، ترڅو د افغان پناه غوښتونکو د حضور نېټه تر شپږو نورو میاشتو وغځوي.
دغه وزارت د خپل هېواد کورنیو چارو وزیر ته هم سپارښتنه کړې وه چې له ټولو ارزونو وروسته د ځينو افغانانو د منل کېدو او یا هم نهمنل کېدو په تړاو پرېکړه د دې وزارت په غاړه ده.
پاکستان کې مېشت افغانان هم په دې هېواد کې خپل وضعیت خورا ناوړه بولي او وایي، له سختو ستونزو کړېږي.
پاکستان مېشت افغان خبریال ظاهر بهاند وايي: « هغه افغانان چې امریکا او اروپايي هېوادونو ته د تلو په تمه وو، اوس له سختو ستونزو او کړاوونو سره مخ دي. دا باید په ډاګه ووایم چې وروسته له هغې چې د امریکا هېواد ټول کېسونه وځنډول، خورا ډېر خلک اغېزمن شول او اوس یې برخلیک ناڅرګند دی.»
د جرمني بهرنیو چارو وزیر همدارنګه ویلي، که له پاکستانه د افغان پناهغوښتونکو په لېږد کې بېغوري کېږي، نو ښايي دغه هېواد کې په تمه افغان پناهغوښتونکي د را روان نوي میلادي کال په پیل سره په زوره له پاکستان څخه و ایستل شي.
یو شمېر افغان کډوال په پاکستان کې هم د دوی پر وړاندې روان چلن له تاریخي اړخه خورا ناوړه بولي او وایي، له تېرو ۴۵ کلونو راهیسې ژوند کوي، خو له دا ډول ناوړه چلن سره مخ شوې نه وو.
افغان کډوال حاجي نظر خوږیاڼیوال وايي: « افغان کډوالو له تېرو ۴۵ کالو راهیسې ژوند کوي، خو په دا دومره وخت کې له دا ډول ستونزو سره نه وو مخ شوي. موږ د پاکستان قانون ته ژمن یو، خو د دې هېواد مرکزي حکومت چې اوس کومه پالیسي د افغانانو ځورولو لپاره کاروي، دا یوه ظالمانه پالیسي ده، د بشري حقونو او کډوالو د حقونو خلاف ده.»
د جرمني بهرنیو چارو وزیر داسې مهال په پاکستان کې د افغان کډوالو پر وضعیت اندېښنه څرګندوي چې له تېرو درېیو کالو راهیسې پاکستان په پرله پسې توګه هڅه کوي پر افغان کډوالو فشارونه زیات او په زور یې له خپل هېواده وباسي.
که څه هم د پاکستان حکومت پر دې کړنو ګڼ شمېر هېوادونو او نړیوالو بنسټونو سختې نیوکې وکړې، خو دا لړۍ لا هم رونه ده.
