د هېواد لوېدیځ زون دیني عالمانو، سیاستوالو، قومي مشرانو او مخورو د بهر مېشتو سیاستوالو، سوداګرو او پانګوالو د بېرته رابللو په موخه، د اسلامي امارت د مشرتابه د عمومي بښنې فرمان او د پاکستان په وړاندې د اسلامي امارت له دریځه خپل ملاتړ اعلان کړ.
دوی چهارشنبه هرات کې د یوې غونډې پرمهال وویل، پاکستان د افغانستان له تاریخ خبر نه دی، د ګاونډیتوب او نړیوالو اصولو په خلاف د افغانستان پر خاوره بریدونه کوي او دوی په هره ډول حالاتو کې د افغان ځواکونو ترڅنګ، له هېواد څخه د دفاع لپاره ولاړ دي.
پخوانی مجاهد وکیل احمد وايي: « یوه ورځ د پاکستان دفاع وزیر موږ ته ګواښونه کوي بله ورځ د نواز شریف لرو. هېڅ معلومه نه ده چې دغو خلکو زموږ د قهرمان ملت تاریخ لوستی دی کنه.»
د جمهوري حکومت د ولسي جرګې غړی خلیل احمد شهیدزاده وايي: « نن د دې وخت چې موږ ټول په هېواد کې د امنیت ساتلو او له بهرنۍ مداخلې څخه د هېواد ژغورلو په موخه، د خبرو اترو او تفاهم له لارې خپلې ستونزې هوارې کړو.»
د جمهوري حکومت پرمهال د هرات ولایتي شورا غړی غلام حبیب هاشمي وايي: « د پاکستان مداخله او د فشارونو راوړل د ټولو نړیوالو قوانینو خلاف دي. دوی تل د نړیوالو اصولو خلاف پر افغانستان بریدونه کړي او دا د افغانستان د خلکو لپاره د منلو نه ده. موږ له نړیوالې ټولنې غواړو چې د پاکستان د دښمنانه چلن مخه ونیسي.»
په هرات کې د لوېدیځ زون دیني عالمانو، سیاستوالو او قومي مشرانو د بښنې له فرمان څخه دا ملاتړ داسې مهال کړی چې په هېواد له بیا واکمنیدو وروسته د اسلامي امارت مشرتابه خپلو ټولو ادارو، چارواکو او ځواکونو ته امر وکړ چې دا فرمان په بشپړ ډول پلی کړي.
په فرمان کې دوی ته دا سپارښتنه هم شوې چې د پخواني نظام هر چارواکی چې په هره کچه وي او هېواد ته راستون شي، کولی شي د نورو عامو افغانانو ترڅنګ ډاډمن او عادي ژوند وکړي.
په همدې حال کې د لوېدیځ زون دیني عالمانو، سیاستوالو او مخورو وویل، په هېواد کې جګړه پای ته رسېدلې او اوس د دې وخت دی چې افغانان په پشپړ اتحاد او یوالي سره د هېواد په بیارغونه کې برخه واخلي.
دیني عالم محمد سرور رسولي وايي: « زه له ټولو غواړم چې خپل هېواد ته راشي او دلته په عزت ژوند وکړي.»
د پوهنتون استاد سید احمد قتالي وايي: « نور باید زموږ هېواد د اختلافونو او جګړو خواته لاړ نه شي، باید پر خپل ملت ترحم وکړو ترمنځ د باور فضا پراخه کړو.»
په ورته وخت کې چارواکي ډاډ ورکوي چې په هېواد کې امنیت ټینګ شوی او ټولو افغانانو ته د آرام ژوند تېرولو شرایط برابر شوي دي.
دوی له بهر مېشتو افغانانو وغوښتل چې د اسلامي امارت د مشرتابه د عمومي بښنې فرمان له مخې خپل هېواد ته راستانه شي.
د افغانستان د سولې او دعوت مسوول محمد زبیر مبشر وايي: « د امیرالمؤمنین له خوا د پخواني حکومت ټول چارواکي او سیاستوالو ته بښنه شوې؛ که دا بښنه نه وای شوې، موږ به بیا جګړو ته مخه کوله.»
په هېواد کې د اسلامي امارت له بیا واکمنېدو وروسته د اسلامي امارت مشرتابه د بښنې فرمان په صادرولو او پلې کولو سره د لوېدیځې نړۍ هغه تبلیغات بې بنیاده ثابت کړل چې ویل یې، د اسلامي امارت په راتګ سره د پخوانۍ ادارې چارواکو ژوند او ازادۍ ته ګواښ متوجه دی.
د ورکړل شویو معلوماتو له مخې، له دې فرمان څخه په ګټه اخیستنې زیات شمېر بهر مېشت افغانان بېرته خپل هېواد ته راستانه شوي دي.
