له محدودې چوپتيا وروسته يو وار بيا د پاکستان پوځي رژيم لوړ پوړو چارواکو افغانستان مخاطب کړی او خپلو ستونزو ته يې د افغانستان په وسيله د حل غوښتنه کړې.
د دې پوځي رژیم د دفاعي ځواکونو مشر له اسلامي امارت غوښتي چې د وسله والو ډلو او پاکستان ترمنځ له دوو غوارويو يو هغه وټاکي. عاصم منير دا څرګندونې د دوشنبې په ورځ په راولپنډۍ کې د فاعي ځواکونو د قومندانۍ پرانيستې پرمهال کړې او زياته کړې يې ده چې افغانستان ته يې په روښانه ټکو پیغام رسولی، ترڅو د وسله والو ډلو او پاکستان ترمنځ یو انتخاب کړي.
د پاکستان پوځي مشرعاصم منیر زیاته کړې: « موږ په افغانستان کې اوسني حکومت ته يو روښانه پيغام رسولی؛ هغه دا چې د پاکستان او فتنه الخوارج تر منځ له غواروي پرته بله لار نه لري.»
پاکستان د “فتنه الخوارج” ټکی د پاکستاني طالبانو تحریک(ټيټيپي) ته کاروي.
اسلامي امارت تر اوسه د عاصم منير څرګندونو ته غبرګون نه دی ښودلی، خو وړاندې یې ویلي چې دا د پاکستان کورنۍ مسئله ده او د افغانستان له خاورې د نورو هېوادونو په ضد فعاليتونو ته اجازه نه ورکول کېږي.
د چارو څارونکي هم د پاکستاني طالبانو تحریک د پاکستان کورنۍ مسئله بولي او وایي، اړتیا نه شته چې د پاکستان کورنيو ستونزو ته له افغانستان سره تړاو ورکړل شي.
د پوځي چارو شنونکی توریالی ځاځی وايي: « دا پرېکړه باید خپله پاکستان وکړي، دا په افغانستان پورې هېڅ تړاو نه لري، دا د دوی کورني مسایل دي. ټيټيپي په ۲۰۰۶ کال کې رامنځته شوې. له تېرو څلورو لسیزو راهیسې پاکستان په افغانستان کې جنایتونه ترسره کړي او اوس دغو جنایتونو ته په نویو بڼو ادامه ورکوي.»
دا لومړی ځل نه دی چې پاکستان له اسلامي امارت دا ډول غوښتنه کوي. دوی په تېر کې هم ورته غوښتنې او پوښتنې کړې دي.
د سیاسي چارو شنونکي د پاکستان پوځي رژیم غوښتنې له سیاسي اړخه لویه تېروتنه او د شرم وړ بولي او وایي، دوی حق نه لري چې له افغانستان څخه د خپلو داخلي ستونزو د حل لپاره دا ډول غوښتنې وکړي.
د سیاسي چارو شنونکی شهسوار سنګروال وايي: « دوی حق نه لري چې یوه خپلواک هېواد ته داسې شرط کېږي چې یا به دا کوې یا هغه. دوی زموږ حکومت ته د فرمایش ورکولو حق نه لري.»
د پوځي چارو یو شمېر نور څارونکي بیا وایي، د پاکستان پوځي رژیم د لوېدیځ په اشارې هڅه کوي چې په سیمه کې یوې بلې جګړې ته زمینه برابره کړي.
د پوځي چارو شنونکی اختر محمد راسخ وايي: « دوی چې له غربي نړۍ څخه کوم قرارداد اخیستی، غواړي له مخې یې افغانستان کې نا امنیو ته لاره هواره کړي.»
پاکستان د اکټوبر لومړیو کې په کابل او پکتیکا کې هوايي بريدونه وکړل او ادعا یې کوله چې پاکستاني طالبان يې په نښه کړي. په دغو بریدونو د کرېکټ د کورنیو لوبغاړو په ګډون ولسي خلکو ته مرګ ژوبله اوښتې.
د اسلامي امارت دغو بریدونو ته د ډیورنډ کرښې په اوږدو کې د پاکستاني ځواکونو پر پوستو او پوځي مرکزونو په بریدونو سره ځواب ورکړ او له هغې راهيسې د افغانستان او پاکستان ترمنځ اړيکې ترينګلې شوې چې په لړ کې يې پاکستاني چارواکي وخت ناوخت دا ډول غیر منطقي غوښتنې کوي.
