د افغانستان لپاره د قزاقستان ځانګړي استازي له ګڼو افغان چارواکو سره په جلا لیدنو کې پر بېلابېلو مهمو مسایلو خبرې کړي.
یرکین توکوموف د کورنیو چارو له وزیر خلیفه سراجالدین حقاني سره په لیدنه کې د دواړو هېوادونو ترمنځ د اقتصادي او سوداګریزو اړیکو پر ودې غږېدلی د وسپنې پټلۍ په څېر پروژو پر عملي کېدا هم بحث شوی.
کورنیو چارو وزارت وايي، چې توکوموف دغه راز د پولو امنیت پیاوړتیا، د نشهيي توکو پر ضد په ګډې مبارزې او د ترکمنستان له لارې د وسپنې پټلۍ جوړولو په برخو کې د همکاریو د دوام ډاډ ورکړی.
د کورنیو چارو وزارت ویاند مل پاسوال مفتي عبدالمتین قانع وايي:« د قزاقستان ځانګړي استازي دغه راز د پولې امنیت پياوړتیا، له نشه يي توکو سره د مبارزې برخه کې د همکاریو دوام او د ترکمنستان له لارې یې د وسپنې پټلۍ پروژې جوړولو چارو پرمخ وړلو باندې ټینګار وکړ.»
بل پلو د قزاقستان ځانګړي استازي د ټولګټو چارو وزارت د وسپنی پټلۍ له مرستیال سره په جلا لیدنه کې د افغانستان له لارې د منځنۍ او سویلي اسیا د نښلولو پر پیل او د تورغونډۍ – هرات د وسپنې پټلۍ د رغونې په تړاو بحثونه شوي.
د وسپنې یادې کرښې د پانګونې هوکړه لیک موده وړاندې د قزاقستان له لوري د ۵۰۰ میلیون ډالرو په ارزښت لاسلیک شوی وو، دا مهال یې په تړاو د دواړو هېوادونو ترمنځ عملي خبرې روان دي.
د ټولګټو وزارت ویاند محمد اشرف حقشناس په دې اړه داسې وايي:« په دې لېدنه کې د افغانستان له لارې مرکزي او سویلي اسیا هېوادونو نښلولو، تورغونډۍ – هرات – کندهار وسپنیزو کرښو عملي چارو د پيل په اړه خبرې اترې وشوې.»
په دغو لیدنو کې افغان چارواکو له قزاقي لوري سره د هر راز همکارۍ او د اړیکو د ودې ډاډ ورکړی.
د چارو شنونکي قزاقستان د منځنۍ اسیا له مهمو هېوادونو یادوي او د وسپنېپټلې له لارې ورسره د سوداګریزو اړیکو پراختیا کولای شي افغانسان د ځینو ګاونډیو هېوادونو له اقتصادي تکیې او احتیاجه خلاص کړي.
د اقتصادي چارو شنونکی عبدالنصیر رشتیا وايي « تجربو ښودلې چې پر یو مسیر اتکاء کولای شي ستونزې رامنځته کړي، څرنګه چې تاسو د دې شاهد یاست ډېر کله پاکستان سوداګریزې لارې بندوي او سوداګري له ستونزو سره مخ کېږي نو په دې بنسټ زه فکر کوم حتی څومره چې د سیمې او ګاونډیو هېوادونو سره ښې اړیکې ولرو په لنډ او اوږدمهال کې د افغانستان پر ګټه وي او کولای شي چې د اړتیا وړ توکي له ګاونډیو او سیمې هېوادونو څخه وارد کړي.»
د افغان او قزاقي چارواکو ترمنځ په لیدنو کې دغهراز پرېکړه شوې چې په نږدې راتلونکي کې به د افغانستان، قزاقستان، ترکمنستان او متحده عربي امارتو د ټرانسپورټ او وسپنې پټلۍ وزیرانو او مرستیالانو ترمنځ د تورغونډۍ – هرات او هرات – کندهار د وسپنې پټلۍ مسیرونو د عملي چارو پیل او پلیتابه څرنګوالي په موخه ګډه ناسته ترسره شي.
