د مزارشریف ښار کارته صلح سیمه کې هغه پنځه سړکونه ګټه اخیستنې ته وسپارل شول چې د ۶ میاشتو په موده کې د ښاروالۍ له خوا جوړ شوي دي.
مسوولین وایي، پر یادو پروژو شاوخوا ۳۹ میلیونه افغانۍ لګښت راغلی چې د مزار ښاروالۍ له بودیجې ورکړل شوی.
د مزار ښاروالۍ سکټوري رییس احمد جاوید مایار وايي: « د دې پروژې په اړه باید ووایم چې دا ټول پنځه سړکونه وو چې اوږدوالی یې نږدې ۱.۵ کیلومټرو ته رسېده. دغو سړکونو دواړو غاړو ته لښتي او د تنویر کارونه هم په کې شامل وو.»
په ورته مهال، د قراردادي شرکت انجینیران د پروژو د کیفیت په اړه ډاډ ورکوي او له ښاریانو هم د ساتنې په برخه کې د همکارۍ هیله کوي.
د قراردادي شرکت مسوول مهدي محمودي وايي: « د دې پروژې اوږدوالی شاوخوا یونیم کیلومټر و چې په کې د روښنايي ۹۰ پایې، د اوبو لښتي او ټول هغه جزئیات لري چې یو معیاري سړک یې باید ولري.»
مزار ښاریان ورورستیو کې د ښاروالۍ د غوره فعالیتونو ستاینه کوي او د ورته نورو پروژو د تطبیق غوښتونکي دي.
د سیمې اوسېدونکی نذیر احمد وايي: « د مزارشریف د ښار په شاوخوا کې نور سړکونه هم خام پاتې دي او له ښاروالۍ غوښتنه کوو چې د همدې سړکونو په څېره هغه هم په اساسي ډول پاخه کړي.»
د سیمې اوسېدونکی عبدالباقي وايي: « د اسلامي امارت په بیا ځل راتګ سره د مزارشریف ښاروالۍ ډېر سړکونه قیر کړل او زموږ خلک اوس له هر پلوه له ستونزو خلاص شول.»
دا پروژې داسې مهال بشپړې شوې چې د ښاروالۍ مسوولین د ورته نورو پروژو د پيل کولو ډاډ ورکوي.
د مزار شریف ښاروالۍ مسوولین وایي، د راتلونکي کال لپاره یې ۲۵ لویې پروژې پلان کړې دي چې د مزار حلقوي سړک یوه برخه هم په کې شامله ده او په ۲۰۲۶ کال کې به پیل شي.
