د افغانستان اسلامي امارت رییس الوزرا ملا محمد حسن اخند د افغانستان لپاره د قطر د نوي سفیر مردف بن علي القاشوطي باورلیک ومانه.
د اسلامي امارت مرستیال ویاند وایي، په دې مراسمو کې ملا محمد حسن اخند هیله څرګنده کړې چې د قطر نوي سفیر معرفي کېدل به د دواړو هېوادونو ترمنځ د شته ډېپلوماټیکو اړیکو د لا پیاوړتیا لامل شي.
بله خوا، مردف بن القاشوطي هم په افغانستان کې پرخپل ماموریت خوښي څرګنده کړې او ژمنه یې کړې چې د قطر او افغانستان د اړیکو او همکاریو پیاوړتیا لپاره به خپلو هڅو ته دوام ورکوي.
د اسلامي امارت مرستیال ویاند حمدالله فطرت وايي: « د افغانستان اسلامي امارت رییس الوزرا محترم الحاج ملامحمدحسن اخند نن له غرمې مخکې د افغانستان لپاره د قطر د نوي سفیر ښاغلي مردف بن علي القاشوطي باورلیک د یو لړ تشریفاتي مراسمو په ترڅ کې ومانه. د اسلامي امارت محترم رییس الوزرا هیله څرګنده کړه چې د قطر د نوي سفیر معرفي کېدل د دواړو هېوادونو ترمنځ د موجوده ډېپلوماټیکو اړیکو د لاپیاوتیا ذریعه شي او نوموړي ته یې په خپل ماموریت کې د بریا دعا وکړه.»
له ارګ څخه خپره شوې خبرپاڼه کې راغلي، د قطر نوي سفیر ویلي چې هېواد یې د اسلامي امارت او افغان ولس نېکمرغي غواړي.
مردف بن علي القاشوطي د اسلامي امارت له هرکلي څخه مننه کړې او ویلي یې دي چې په افغانستان کې د قطر د سفیر په توګه به د قطر او افغانستان د اړیکو او همکاریو د لاپیاوړتیا لپاره هڅې وکړي.
