په داسې حال کې چې روسیه له افغانستان سره رسمي اړیکې لري او د لومړي هېواد په توګه یې د اسلامي امارت حکومت پر رسمیت پېژندلی، پر دې ټولو سربېره د کرېملین ویاند له کابل سره د لا ډېرو تعاملاتو او د اړیکو پیاوړي کولو خبره کړې.
نوموړي له هندي رسنیو سره په خبرو کې افغانستان د سیمې مهم هېواد بللی او په سیمه کې یې اهمیت او اړتیا ته په پام ورسره د اړیکو پراخولو خبره کړې.
ټاس خبري اژانس د دېمتري پسکوف له خولې ویلي، په سیمه او په تېره بیا په ګاونډ کې د ثبات رامنځته کېدا لپاره له افغانستان سره د همکارۍ دوام مهم او حیاتي دی.
د روسیې ولسمشر ویاند دېمتري پېسکوف ویلي: « موږ له افغانستان سره اړیکې پیاوړې کوو. پوهېږو چې هلته موږ ملګري لرو او غواړو د سیمې پر ستونزو له هغوی سره بحث وکړو. موږ په سیمه کې ګډې ګټې لرو او له افغانستان سره به د اړیکو پراخولو ته دوام ورکړو.»
په داسې حال کې چې په تېرو څو لسیزو کې د مسکو او کابل ترمنځ ډېپلوماتیکو، امنیتي او اقتصادي اړیکو لوړې ژورې تجربه کړې دي، خو دا څه د اسلامي امارت له بیا واکمنېدو وروسته نوي پړاو ته ننوتي او پر رسمیت پېژندنې سربېره یې د اسلامي امارت چارواکي د خپلو بندیزونو له تور لېست څخه هم بهر کړي دي.
د ګاونډ او سیمې په سولې او ثبات کې د افغانستان رغنده رول ته په پام، د کرېملین ماڼۍ ویاند ویلي چې مسکو اړ دی چې د همدې ثبات د لاټینګښت په موخه له کابل سره تعامل وساتي او په خبره یې په دې برخه کې له هند سره بشپړ تفاهم لري.
بل پلو، په قطر کې د اسلامي امارت سفیر وايي، له رسمیت پېژندنې وروسته له روسیې سره اړیکو وده کړې او هيله شته چې د دواړو خواوو پلاوي به په راتلونکي کې رسمي سفرونه ولري.
سهیل شاهین وايي: « د روسیې فډراسیون له خوا د افغانستان اسلامي امارت د رسمیت پېژندلو سره، د دواړو هېوادونو له خوا په بېلابېلو برخو کې د اړیکو پراخولو، غښتلي کولو او تعاون زمینه برابره شوې. له دې فرصت څخه په استفادې، موږ غواړو د روسیې له فډراسیون سره اړیکې پراخې کړو. زه امېد لرم په راتلونکي کې به د دواړو هېوادونو پلاوي د یادې موخې ترلاسه کولو په منظور، د یو بل هېواد ته سفرونه ولري.»
روسیې د دې خلاف تل پر لوېدیځ او په ځانګړي ډول پر امریکا له دې کبله نیوکه کړې چې ګواکي د افغانستان ملي شتمني یې کنګل کړې، اقتصادي محدودیتونه یې پرې وضع کړي او پر وړاندې یې د تقابل پالیسي غوره کړې.
شنونکي په سیمه او نړېواله کچه روسیه له زبرځواکونو هېوادونو ګڼي او ورسره د تعامل او اړیکو پراخېدل د افغانستان په ګټه بولي.
د سیاسي چارو شنونکی نجیبالرحمن شمال وايي: « زه هیله لرم چې د افغانستان او روسیې ترمنځ په بېلابېلو سیاسي، اقتصادي، تحصیلي او نورو برخو کې اړیکې ښې شي او د افغانستان له خلکو سره مرسته وکړي. د افغانستان اسلامي امارت کولی شي د عصري وسلو او نظامي تجهیزاتو ترلاسه کولو لپاره هم له روسیې سره تفاهم وکړي.»
دا په داسې حال کې ده چې روسیې په لومړي ځل د روان ۲۰۲۵زېږدیز کال په اپرېل کې د اسلامي امارت تحریم کړې غړي د ترهګرۍ او بندیزونو له تور لېست څخه و ایستل او ورپسې یې د همدې کال د جولای په درېیمه نېټه مسکو ته د کابل له لوري د ورپېژندل شوي سفیر ګلحسن حسن باورلیک ومانه او په پای کې یې د لومړي هېواد په توګه د افغانستان اوسنی حکومت په رسمیت وپېژانده.
روسیې هغه مهال له دې کار څخه اصلي موخه د سیمې د امنیت، له ترهګرۍ او د نشهيي توکو له قاچاق سره اغېزمنه مبارزه بللې وه.
