کابل کې شاوخوا۱۰۰ تنو ځوانانو د زیانمنو ډلو د فني او حرفوي زده کړو له مرکز څخه د فراغت سندونه ترلاسه کړل.
د کار او ټولنیزو چارو وزارت چارواکي وایي، فارغو شویو کسانو د مبایل جوړولو، په ودانیو کې د برېښنا غځونې او نل دوانۍ په برخو کې څلور میاشتنۍ فني او حرفوي زده کړې کړې چې په مرسته یې اوس کولی شي کوچني کاروبارونه او د اقتصادي ملاتړ لپاره فرصتونه رامنځته کړي.
د کار او ټولنیزو چار وزارت د کار معين محمد زاهد احمدزی وايي: « نن ۹۰ تنه شاګردان په درېیو برخو کې فارغ شول. په دې کې نل دواني، برېښنا غځول او د ټیلفون ترمیم شامل دي. دوی کولی شي زموږ د ورکړیو اسنادو پر بنسټ په بازار کې دوکان ولري او خپل کار او کسب وکړي.»
نوموړی همدا راز د بې روزګارۍ کچې کمولو لپاره د کاري فرصتونو برابرولو ډاډ هم ورکوي او وایي، په همدې موخه یې قطر او یو شمېر نورو هېوادونو ته د افغان کارګرو د استولو لړۍ پیل کړې وه چې په خبره یې دا مهال ټکنۍ شوې. نوموړی یې لامل د دې پروسې په اړه د قطري چارواکو نه لېوالتیا بولي.
محمد زاهد احمدزی په دې اړه وايي: « متأسفانه څومره چې قطریان په لومړي سر کې ګرم وو، اوس هغسې نه دي. نورو کومو هېوادونو ته چې افغانان ځي او له موږ سره تفاهم نامې لري، هغوی په عادي ډول تګ راتګ کوي. بیا هم تمه شته چې قطریان بېرته جدي شي.»
بله خوا، له فني او حرفوي زده کړو فارغ شوي کسان د یادې څلور میاشتنۍ دورې له بشپړېدو د خوښۍ ترڅنګ له حکومت او اړوند ادارو د کاري فرصتونو غوښتنه کوي.
له فني او حرفوي زده کړو یو تن فارغ شوی کس وايي: « موږ له دې کورس سل په سلو کې رضایت لرو. ټول ځوانان غواړي کار او کسب ولري او له لارې یې عاید ترلاسه کړي.»
له فني او حرفوي زده کړو یو بل فارغ شوی وايي: « په لومړي سر کې باید ووایم چې د ځوانانو لپاره د یوه داسې ځای جوړول ډېر مهم دي چې دوی په کې زده کړه وکړي. د کار په لرلو سره به دوی له بې ځایه ګرځېدو وژغورل شي.»
یو بل فارغ شوی ځوان وايي: « د ټولو ځوانانو غوښتنه دا ده چې له ټکنالوژۍ سره سم مخکې لاړ شي او له داسې وسایلو کار واخلي چې په اوسنۍ عصر کې کارول کېږي.»
د زیانمنو ډلو د فني او حرفوي زدهکړو یاد مرکز چې د کار او ټولنیزو چارو وزارت په اډانه کې فعالیت کوي، پر مبایل جوړولو، برېښنا غځونې او نل دوانۍ سربېره، بېلابېلو برخو کې عملي او نظري زدهکړې وړاندې کوي او تر دې دمه یې ۲ دورو کې سلګونه ځوانانو ته د فراغت سندونه ورکړي دي.
