د خوست ښار په یوه سپورټي لوبغالي کې د هغې پېښې پرعامل د قصاص حد تطبيق شو چې د جنوري په ۲۸مه يې په علیشرو او تریزیو ولسوالۍ کې يو ځايي کس د کلاشينکوف په وسيله وژلی و.
د خلکو په خبره، د حدودو پلي کول کولی شي په ټولنه کې د جرمونو د ګراف کچه د پام وړ راښکته کړي.
د خوست اوسېدونکی محمد صادق وايي: « ټولو ورغلیو خلکو د مقتول کورنۍ ته عذر وکړ او د قاتل د بښلو غوښتنه یې وکړه، خو هغوی دا کار ونه کړ او بالاخره د قصاص حکم عملي شو.»
د خوست اوسېدونکی روح الله وايي: « اوس خلک د خوندیتوب احساس کوي، دا به سبب شي چې راتلونکي کې څوک په خپل سر د چا په وژلو لاس پورې نه کړي.»
د حکومتي سرچینو د معلوماتو له مخې، د قضیې ټول قانوني پړاوونه د اړوند ارګانونو له لوري تعقیب او بشپړ شوي او په نتيجه کې يې محکمې پر نوموړي کس د اسلامي احکامو مطابق د قصاص حکم وکړ. خلک د جرمونو مخنيوي لپاره غوښتنه کوي چې د اسلامي شريعت احکام دې تطبيق شي.
د خوست اوسېدونکی احسان الله اتل وايي: « د حدودو په پلي کېدو سره د جرمونو مخنیوی کېږي او څوک به د چا وژلو ته زړه ښه نه کړي.»
د خوست اوسېدونکی نصرت الله وايي: «موږ په دې ډېر خوښ یو چې د اسلامي شریعت په رڼا کې سزا ورکول کېږي او د خلکو د حقونو دفاع کېږي.»
قصاص شوی۵۰ کلن منګل د طلاخان زوی د پکتیا ولایت د سیدکرم ولسوالۍ اصلي اوسېدونکی و، خو د پېښې پرمهال د خوست په علیشرو ولسوالۍ کې استوګن و.
په۲۰۲۱ زېږدیز کال واک ته د اسلامي امارت له رسېدو سره، دا په خوست کې د قصاص لومړنی حکم دی چې پلی کېږي.
