د ملګرو ملتونو سرچینې وايي، د امنیت شورا په دې درې میاشتنۍ ناسته کې به د افغانستان او پاکستان ترمنځ د روانې شخړې په اړه هم بحثونه وشي.
د دغو سرچینو د معلوماتو له مخې، د ناستې په پای کې به امنیت شورا یو پرېکړه لیک هم صادر کړي چې په کې به له کابل او اسلام اباد وغوښتلې شي چې د پوځي اقداماتو په ځای، روانې شخړې ته د هواري سوله ییزې لارې وګوري.
دا د ملګرو ملتونو امنیت شورا دوراني غونډه ده چې په هرو درېیو میاشتو کې یوځل جوړیږي او په کې د افغانستان له حالاتو سره تړلي مسایل تربحث لاندې نیول کېږي.
د ملګروملتونو سرچینې وايي، په دې ناسته کې به د افغانستان لپاره د ملګرو ملتونو مرستندویه ماموریت(یوناما) سرپرسته د سیاسي، قتصادي او بشري حالت په اړه مفصل راپور هم وړاندې کړي.
د دې ترڅنګ، ویل کېږي چې د افغانستان لپاره د ملګرو ملتونو د مرستو همغږۍ اداره(اوچا) او د مدني ټولنې غړي به هم د روان حالت په اړه د دوی له خوا شوې څېړنې او موندنې له امنیت شورا سره شریکې کړي.
د ملګرو ملتونو سرچینې دغه راز ویلي: « په ډسمبر میاشت کې به امنیت شورا د افغانستان په اړه خپله درې میاشتنۍ پرانېستې غونډه جوړه کړي چې په کې به د عمومي منشي د ځانګړي استازي مرستیاله او په افغانستان کې د دې سازمان د مرستندویه ماموریت مسووله جورجټ ګانیون د ملګرو ملتونو د بشري مرستو د همغږۍ دفتر یوه لوړ پوړې چارواکې او د مدني ټولنې استازي به امنیت شورا ته خپل معلومات وړاندې کړي.»
د امنيت شورا تېرو ناستو ته په پام، ښايي دا ځل د کډوالو پر وضعیت، امنيتي اندېښنو، په ټولنه کې د ښځو پر بشپړې، مساوي او مانا لرونکې ونډې هم بحثونه د غونډې له مهمو موضوعاتو وي.
امنیت شورا په افغانستان کې پر ښځو او نجونو لګول شویو محدودیتونو نیوکه کړې او په افغانستان کې يې د بشري حقونو وضعیت هم خراب بللی؛ هغه مسایل چې اسلامي امارت په وار وار رد کړي او د دوی حقونه یې خوندي بللي دي.
د ملګرو ملتونو امنیت شورا ویلي: « د اوچا له خوا د خپرو شويو شمېرو له مخې، تمه کېده چې په ۲۰۲۵ کال کې به ۲۲.۹ میلیون افغانان چې د هېواد د نفوس له نیمایي ډېر دي، بشري مرستو ته اړتیا ولري. د بشري مرستو چمتو کولو هڅې، سږکال له ایران او پاکستان څخه د شاوخوا ۲ ميلیونه افغانانو د جبري راستنېدو له امله پېچلې شوې دي.»
دا غونډه د امنیت شورا د منظم راپور ورکولو په لړ کې ترسره کېږي، ترڅو د افغانستان پر حالاتو د نړیوالو بحث او څار بهیر روان وساتل شي.
اقتصاد وزارت د ملګرو ملتونو له امنیت شورا غواړي چې د افغانستان لاسته راوړنو په پام کې نیولو سربېره دې د افغانستان اقتصاد ته لومړیتوب ورکړي او کنګل شوې شتمني دې آزاده کړي.
د اقتصاد وزارت مسلکي معين عبداللطیف نظري وايي: « د ملګرو ملتونو په راتلونکې غونډه کې باید د افغانستان د خلکو اقتصادي لومړیتوبونه، پراختیايي پروګرامونه او د افغانستان د اقتصادي او زېربنايي جوړښتونو پياوړي کول تر لاس لاندې ونیول شي، د افغانستان له خلکو او ثباتې اقتصادي ودې څخه ملاتړ ته باید توجه وشي.»
د نړیوالو اړیکو شنونکي بیا وایي، د ملګرو ملتونو امنیت شورا ناسته کولی شي د افغانستان او نړیوالې ټولنې ترمنځ د تعامل لپاره د لارې نقشه جوړه او سیاسي کشالې د حل لپاره یو لوری مشخص کړي.
د نړیوالو اړیکو شنونکی سمیرانګار وايي: « نړیواله ټولنه باید دا درک کړي چې افغانستان انزوا ته نه بلکې عملي همکاریو ته اړتیا لري، هر ډول بنډيزونه او فشار چې پر افغانستان راوړل کېږي، زیان یې په مخامخ توګه ولس ته رسېږي. باید په دې ناسته کې دا سلامي امارت استازی شتون ولري، ترڅو د افغانستان ښه روایت او تصویر وړاندې شي. د اسلامي امارت له استازي پرته دا ډول ناستې نیمګړې پاتې کېږي.»
که څه هم اسلامي امارت تر اوسه په دې اړه څه نه دي ویلي، خو له دې وړاندې یې ټینګار کړی و چې په ورته ناستو کې يې بايد استازي ته د ګډون اجازه ورکړل شي.
دا ناسته داسې مهال ترسره کېږي چې د وږي په ۱۷مه نېټه د ملګرو ملتونو په امنیت شورا کې هند، ایران، چین او قرغیزستان له اسلامي امارت سره پر تعامل او په افغانستان کې د ثبات پر ملاتړ ټینګار کړی و.
