د غصب مخنیوي کمیسیون مسوولین وایي، د کندهار په ښار او ولسوالیو کې یې زرګونه جریبه ځمکه له غصب راګرځولې ده.
د مسوولینو په خبره، په تېرو درېیو میاشتو کې شاوخوا ۳۰ زره جرېبه دولتي ځمکه له غاصبینو خلاصه شوې او په وینا یې، لا یې هم دا چاره دوام لري.
د دوی په وینا، یادې ځمکې به له غصب څخه تر خلاصون وروسته د راستنېدونکو کډوالو لپاره د ښارګوټو او دغه راز صنعتي ښارګوټو جوړولو او ورته نورو چارو لپاره وکارول شي.
کندهار کې د ځمکو د غصب مخنیوي تخنیکي پلاوي غړی مولوی عبدالمتین سعید وايي: « په هر ولایت یې کې تخنیکي پلاوی شته او د ټول هېواد په کچه بیا کمیسیون موجود دی. په دغو ځمکو کې د راستنېدونکو لپاره ښارګوټي جوړېږي، صنعتي پارکونه جوړېږي، همدارنګه مستحقو کسانو او معلمینو ته ورکول کېږي، اداري ساحات په جوړېږي. په ټولیزه توګه دا ځمکې د عامه ګټو لپاره کارول کېږي.»
په ورته مهال، د کندهار اوسېدونکي هم د غصب د مخنیوي کمیسیون یاد ګام ګټور بولي او زیاتوي چې پر راستنو شویو کډوالو او ناخبره خلکو دې د دغو ځمکو له پلورلو څخه مخنیوی وشي.
دوی له خلکو غواړي چې د هر ډول املاکو او جایدادونو د رانیولو پرمهال دې خپل ملکیت تثبیت کړي او وروسته دې یې وپېري.
د کندهار دامان ولسوالۍ اوسېدونکی محمد عمر وايي: « دا ښه خبره ده چې ځمکې له غصب څخه راخلاصې شي. په دې ځمکو باید د مهاجرو لپاره ځایونه جوړ شي.»
د کندهار اوسېدونکی محمدالله وايي: « له غصبه د ځمکو راګرځول ډېر ښه کار دی، دا باید هغو کسانو ته ورکړل شي چې ځمکې او کور نه لري. همدارنګه په دې ځمکو کې ښوونځي، مدرسې او کلینیکونه جوړ شي.»
د کندهار اوسېدونکی عبدالغفار فاروقي وايي: « څوک چې ځمکې رانیسې، باید لومړی ښه معلومات وکړي او په ډاګه کړي چې دا ځمکې شخصي ده که حکومتي. همدارنګه د ځمکو پلورونکي هم نه باید په خلکو د بل چا یا حکومت ځمکه خرڅه کړي، دا غلط کار دی.»
د یادونې وړ ده چې تردې مخکي هم د غصب مخنیوي کمیسیون له خوا را ګرځولو شویو ځمکو زیاته برخه د صنعتي پارکونو او کډوالو لپاره د ښارګوټو او ټرانسپورټي ترمینلونو جوړولو لپاره ورکړل شوې دي.
