د ايران حکومت په يوه تازه اقدام کې افغانستان ته ۲۹۲ تنه افغان بندیان چې په دې هېواد کې یې په بېلابېلو جرمونو لاس پوری کړی و، سپارلي دي.
د زندانونو چارو د سمون ادارې مسوولان وايي، ياد شمېر بنديان د دواړو هېوادونو ترمنځ د شوې هوکړې له مخې افغانستان ته سپارل شوي دي.
د دوی په خبره، له ايرانه انتقال شوي زندانيان به د خپلو ولايتونو په اړوند زندانونو کې د بند پاتې موده تېره کړي.
د زندانونو چارو سمون ادارې وياند محمد نسيم لالهاند وايي: « د افغانستان اسلامي امارت د زندانیانو را لېږدولو کمېټې د ایران اسلامي جمهوري دولت د عدلیې وزارت ترمنځ د لاسلیک شوي هوکړه لیک پر بنسټ، په تېرو دوو ورځو کې ۲۹۲ تنه افغان زندانیان چې هلته په حبس محکوم شوي وو، افغانستان ته را انتقال او بیا د زندانونو چارو سمون ادارې ته وسپارل.»
د ایران حکومت له دې وړاندې هم څو ځله افغان بندیان د افغانستان حکومت ته سپارلي، ترڅو د بند پاتې موده افغانستان کې تېره کړي.
دا په داسې حال کې ده چې د ایران حکومت تقریبا ً هره میاشت یو شمېر افغان بندیان اعدام کړي هم دي.
