د هلمند د ګرېشک او موسی کلا والسوالیو ترمنځ د ۴۶.۵ کیلومټره عمومي سړک جوړولو چارې د ټولګټو چارو وزارت په یو میلیارد او ۳۲ میلیونه افغانیو لګښت پيل شوې.
مسوولین وایي، دا سړک د هلمند ناومېش، بغنی، باغران، نوزاد، موسی کلا او ګرېشک ولسوالیو ترڅنګ، هلمند له غور، هرات او کندهار ولایتونه هم سره نښلوي.
چارواکي ډاډ ورکوي چې د دې پروژې په څېر یو شمېر نورې عام المنفعه پروژې هم په پام کې شته.
هلمند والي امان الدین منصور وايي: « اسلامي امارت وتوانېده چې له خپلو داخلي عوایدو د حکومت چارې په څلورو کالو کې جاري وساتي.»
په ورته وخت کې د ټولګټو چارو ریاست مسوولین وایي، په دې پروژه کې د سړک جوړونې نړیوال سټنډرډونه په نظر کې نیول شوي چې چارې به یې د دوو کلونو په اوږد کې بشپړې شي .
د هلمند ټولګټو چارو ریاست د کار او ساختمان آمر انجینر ګل احمد ویاړ وايي: « دا سړک ۴۶.۵ کیلومټره اوږدوالی لري او په دوو لاټونو کې تطبیق کېږي. لومړی لاټ یې ۲۰ کیلومټره او دویم لاټ یې ۲۶.۵ کیلومټره دی. د دې سړک لومړی لاټ د ۴۳۲ میلیونه افغانیو په لګښت جوړېږي او دویم لاټ به یې د ۶۰۰ میلیونه افغانیو په لګښت جوړ شي. دا پروژه به په ۲ کالو او ۲ میاشتو کې ټوله تطبیق شي.»
بله خوا، د دې ولایت د موسی کلا ولسوالۍ یو شمېر اوسېدونکو یاده پروژه د شمالي ولسوالیو لپاره ارزښتمنه بولي، خو یادو ولسوالیو ته د لازیاتې پاملرنې غوښتنه هم کوي.
د موسی کلا اوسېدونکی محمد ظاهر وايي: « د موسی کلا او پنځو شمالي ولسوالیو ستونزې به ټولې هوارې شي. همدارنګه غور ولایت او روزګان ولایتونو به هم د خلکو تګ راتګ اسانه شي.»
د موسی کلا اوسېدونکی سید محمد وايي: « دا پروژه د هلمند ولس لپاره د حکومت لوی خدمت دی. موږ د دې ډول نورو پروژو د پلي کولو غوښتنه هم کوو.»
د دې سړک جوړېدل به نه یوازې د هلمند شمالي ولسوالیو اوسېدونکو ته تګ راتګ اسانه کړي بلکې د یادو ولسوالیو د اوسېدونکو اقتصادي وده کې به هم اغېزناک رول ولوبوي.
