د هرات – کندهار لویې لارې اوږدو کې د هرات ولایت د زاول ولسوالۍ مربوطاتو کې د یوه کوچني بس(فلانکوچ) او ۳۰۲ ډوله لوی بس موټرو ترمنځ د ټکر له امله شاوخوا ۱۸ کسانو ته مرګ ژوبله اوښتې.
د هرات حوزوي روغتون مسوولین وایي، په دې پېښه کې ۱۱ تنو ژوند بایللی او ۷ نور ټپیان دي. په مړو شویو کسانو کې دوې ښځې او یو ماشوم هم شامل دي.
د هرات حوزوی روغتون سرطبیب فرهاد افضلي وايي: « سهار وختي د دې حادثې له امله بدبختانه ۱۱ تنه مړي او ۷ تنه هم ټپیان روغتون ته راوړل شوي دي. د ټپیانو له ډلې هم د یوه کس روغتیايي وضعیت نازک دی.»
هرات کې خلک د ټرافیکي پېښو لوی لامل د موټر چلوونکو بې احتیاطي او ټرافیکي قوانینو ته نه پاملرنه ګڼي.
په ورته مهال، روغتیا پالان ټینګار کوي چې د موټرو ټکرونو له امله ټپيان بیا پخواني ژوند ته په سختۍ ورګرځي. له همدې امله سپارښتنه کوي چې باید د موټر چلولو پر مهال له احتیاط کار واخلي.
یو تن ډاکټر برکت الله محمدي وايي: « کله چې په دومره ډېر سرعت حادثه کېږي، د تلفاتو کچه یې هم لوړه وي. هغوی هم چې ژوندي پاتې کېږي، تر ډېره معیوبېږي. د ټرافیکي قوانینو په رعایت سره د دغو پېښو مخنیوی کېدای شي.»
د هرات اوسېدونکی جاوېد وايي: « ښار ډېر بېروبار دی او چلوونکي ټرافیکي قوانین په پام کې نه نیسي. له ټرافیکو ریاست غوښتنه کوم چې ګامونه پورته کړي.»
د هرات اوسېدونکی رامین وايي: « باید د موټرو او نورو وسایطو له تېز چلولو مخنیوی وشي، ترڅو پېښې هم کمې شي.»
دا لومړۍ پېښه نه ده چې ډېرو خلکو ته په کې مرګ ژوبله اوړي. روان کال پر همدې لویه لار ګذرې ولسوالۍ اړوند سیمه کې د مازدا او۵۸۰ ډول بس موټرو ترمنځ د ټکر په پېښه کې هم شاوخوا ۸۰ کسانو ته مرګ ژوبله اوښتې وه.
تازه د هرات حوزوي روغتون مسوولین هم وایي، هره ورځ ۳۰ تر ۳۵ کسان د ټرافیکي پېښو له امله په ټپي حالت کې دې روغتون ته وروړل کېږي.
