د ارملک - لامان سړک هرات ولایت له بادغیس ولایت او بیا له شمالي ولایتونو سره نښلوي. د دې سړک د اسفالټ چارې د بادغیس تر سبزک بند پورې بشپړې شوې دي.د قراردادي شرکت مسوولین وایي، د یاد سړک رغنیزې چاري د هرات کرخ ولسوالۍ د ارملک له سیمې څخه پیل او د بادغیس تر لامان سیمې پورې رسېږي چې تر راتلونکې یوې اوونۍ به بشپړې شي. د قراردادي شرکت رییس هارون عظیم وايي: « پاتې برخه چې شاوخوا ۱۰ کیلومټره وه، شاوخوا ۳.۵ کیلومټره یې د وروستیو سیاسي تحولاتو له امله پاتې وه. اوس یې کار پيل شوی او راتلونکو څو ورځو کې به یې کارونه بشپړ شي. په دې سره به د هرات – بادغیس خلک لویه ګټه واخلي.» یاد سړک ۵۲ کیلومټره اوږدوالی لري چې چاري یې د څه باندي ۶۲ میلیون ډالرو په لګښت د تېر حکومت پرمهال پیل شوې وې، خو یوازې د بادغیس اړوند سبزک بند مربوطاتو کې یې درې نیم کیلومټره برخه پاتې ده. د هرات ټولګټو ریاست د ساختماني چارو آمر ګل اغا نصرت وايي: « موږ له شرکتونو سره د کار پرمهال کیفیت ته ډېره پاملرنه کوو. د خدای فضل دی اوس په هره برخه کې ښه تکړه انجینران لرو، موږ هېوادوالو ته ډاډ ورکوو چې دا سړک به په ښه کیفیت جوړ کړو.» بله خوا، مسافر او موټرچلوونکي د دې لارې جوړېدل مهم بولي او وايي، له دې سره به په ټرافیکي پېښو کې د پام وړ کموالی راشي.د بادغیس اوسېدونکی حامد وايي: « دا لاره ډېره خرابه او خطرونو ډکه وه؛ که د دې لارې کارونه بشپړ شي، دا به خلکو ته ډېرې اسانتیاوې راولي.» موټر چلوونکی اسدالله وايي: « زموږ موټر به تل په خټو کې نښتي وو، جمپونه او کندې وې. اوس نو دا دی سړک پخېږي او خلک ډېر خوشاله دي.» موټر چلوونکی هارون حمیدي وايي: « په دې لاره ډېرې ستونزې او مشکلات وو، اوس چې سړک جوړېږي هیله لرو د خلکو ستونزې هم کمې شي.» د یادونې ده چې د دې سړک د جوړېدو قرارداد په ۱۳۹۰ لمریز کال له سندرېلا شرکت سره شوی و، خو د وروستیو تحولاتو او نورو ناڅرګندو دلایلو له امله یې چاري څو ځله درېدلې وې. تمه کېږي چې دا ځل به د دې حلقوي سړک چارې بشپړې شي. شریک یې کړئ
