د پاکستان ولسمشر عارف علوي د اسلامي امارات د لوړو زده کړو وزارت چارسمبالي وزیر عبدالباقي حقاني په ګډون اسلاماباد ته تللي پلاوي سره د ناستې پر مهال ویلي، د افغانستان له ښوونیز سکتوره ملاتړ کوي.
علوي زیاتوي:«پاکستان به د خپلو ټولو امکاناتو په کارولو سره د افغانستان ښوونیز له سکټور پرمختګ، ظرفیت لوړونې او تعلیمي بنسټونو ملاتړ وکړي او دغه ملاتړ به یې لا نور هم دوام وکړي.»
علوي پر نړیوالو غږ وکړ،چې له افغانستان سره خپلې بشري مرستې زیاتې کړي.
علوي زیاتوي:«افغانستان له ډېر بد وضعیت د تېریدو په حال کې دی او نړیواله ټولنه باید د بشري ناورین د مخنیوي او د ژوند ژغورنې لپاره افغانانو سره اقتصادي او بشري مرستې وکړي.»
اخوا د پاکستان لومړي وزیر عمران خان هم د اپکس کمیټي په نوم ناسته کې چې د افغانستان په تړاو جوړه شوې وه،پر نړیوالو یې غږ وکړ،چې د افغانستان منزوي کول به د ټولو پر زیان وي او د نړۍ یو هېواد به یې له بدو اغېزو خوندي پاتې نه شي.
خان وايي:« نړیواله ټولنه باید افغانستان منزوي نه کړي او له پامه یې ونه غورځوي او د مستحقو افغانانو ملاتړ دې وکړي،ځکه که وضعیت همداشان دوام وکړي،نو دا زیان به یې ټولې نړۍ ته ورسیږي.»
د افغانستان په تړاو د اپکس کمیټې په کنفرانس کې د پاکستان د بهرنیو چارو وزیر شاه محمود قریشي ترڅنګ د پاکستان د کابینې ګڼو وزیرانو ګډون کړی وو.
د پاکستان لومړي وزیر او ولسمشر داسې مهال له افغانستان سره د بشري مرستو غږ وکړ، چې وړمه ورځ یې هم د تورخم له لارې د ۵ میلیارده کلدارو په ارزښت بشري مرستې افغانستان ته راواړول شوې.
