له دې سره بلخ کې د ټولنيزو چارو یو شمېر فعالان له حکومته غوښتنه کوي،چې دغه ولايت کې دې د برېښنايي پېژندپاڼو د وېش نور مرکزونه هم پرانېستل شي.
چارواکي وايي، دمګړی د برېښنايي پېژندپاڼو د وېش يو مرکز فعال شوی او د مرکز له امر وروسته به دوه نور مرکزونه هم پرانيزي.
مزارشریف ښار کې ټولنیز فعال تاج الدين خرم وايي:« د اوس لپاره په مزار شریف ښار کې يو مرکز پرانېستل شوی دی. زه هېله من يم،چې دوه نور مرکزونه هم فعال شي،ځکه د خلکو تقاضاء زياته ده.»
د بلخ احصايې ریاست مشرمحمد نور وثيق وايي:« موږ هم دا تائيدو،چې بلخ کې مراجعين زيات دي او يو مرکز بسنه نه کوي. د دوه نورو مرکزونو ټول وسايل هم اماده دي، چې کله له مرکزه امر وشي،نو نور مرکزونه هم فعالوو.»
افغانستان کې د مخکیني حکومت له سقوط او د نوي حکومت له رامنځته کېدو سره د برېښنايي پېژندپاڼو د وېش مرکزونه تړل شوي وو؛ خو دمګړی د بلخ په ګډون په ډېری ولايتونو کې دغه پروسه بېرته پیل شوې ده.
