بل پلو اقتصاد پوهان وایي، د یادو مرستو پر مټ به د افغانیو ثبات هم تامین شي او تر ډېره به دافغانستان بازارونو کې د ډالرو کمښت ستونزه حل کړای شي.
اقتصاد پوه نورالله عزیز عزیز وايي:« که چېرې دغه مرستې د افغانستان د مالي نظام د بانکي سکتورونو له لارې مالي نظام ته داخل شي،د تبادلې نرخ سربیره به د بیو کچه هم تر ډیره بریده راکمه شي.»
خو یو شمیر نور اقتصاد پوهان بیا په دې اند دي،چې دغه مرستې د افغانانو دایمي ستونزه نه شي حل کولی او د افغانستان په اقتصادي ځان بسیاینې ټینګار کوي.
د اقتصاد پوه عبدالقادر جیلاني وايي:« دغه مرستې نه شي کولای،چې د افغانانو تقدیر بدل کړي،ځکه دا مرستې بیا هم بندیږي او طالبان دې یوازې دې ته په تمه نه اوسي،چې افغانستان دې په مرستو وچلېږي. شل کاله مخکې هم موږمرستې درلودې، نو باید پر اقتصادي سکتور تمرکز زیات شي.»
ملګرو ملتونو دغه پریکړه وروسته له هغې کوي،چې په دننه یوه اونۍ کې د ډالرو پر وړاندې د افغانیو ارزښت بې ساری ټيټ شو او د یوه ډالر بیه له یوسل او دیرش افغانیو هم پورته ولاړه، چې ورسره سم په بازارونو کې د خوراکي اوغیر خوراکي توکو بیې هم څو برابره لوړې شوې.
