Skip to content
د افغانستان کانونو او پترولیم وزارت، د ننګرهار ولایت ګوشتې ولسوالۍ څپرې سیمې اول بلاک کې د نفرایټ ډبرې کان د یوې ازادې داوطلبۍ په پایله کې یوه افغاني شرکت ته في ټُن په ۱۷ لکه او شپیته زره افغانۍ ورکړ.
د یاد وزارت چارسمبالی شیخ شهاب الدین دلاور وايي:« مبارک مو شه! خو ګوره د ټولو مخکې درته وایم،چې په قرارداد کې ځنې شرطونه درته لرو، د هغې په اړه درسره خبرې کوو.»
دلاور وايي، ګټونکی شرکت د ارزیابۍ ۸۳ اعشاریه ۷ نمرې ترلاسه کړي،چې د ۷۷ نیم هکټاره مساحت پر کچه د نفرایټ ډبرې تړون یې ترلاسه کړ.
لومړی به د کان په تړاو څېړنې کېږي،ذخېره به یې تثبیت کېږي او بیا به د وزارت له تائیدۍ وروسته استخراج او ګټې اخیستنې ته چمتو کېږي.
وزیر سپارښتنه وکړه،چې کانونه باید په مسلکي او عادلانه توګه استخراج شي،چې نه ملت او نه حکومت زیانمن شي.
دلاور زیاتوي:« هغه چا چې قرارداد وګاټه،هغه ته ځنې شرایط لرو،چې داسې به نه کوي، چې معدن خراب کړي او په غیر مسلکي بڼه یې وباسي او یو څه شی ترې واخلي.»
د نفرایټ ډبرې لپاره د نورو هېوادونو ترڅنګ تر ټولو ښه بازار چین او جاپان دی،چې په مجسمو، ګلدانونو، لوحو او نورو انتیک شیانو کې ترې کار اخېستل کېږي.
افغانستان چې د کاني زېرمو له پلوه غني هېواد دی، ویل کېږي،که یاد کانونه استخراج شي، اړتیا نه شته دی،چې د مرستې لپاره نړۍ ته لاس اوږد شي.
