د افغانستان د خبریالانو خوندیتوب کمېټه له لوري یکشبنې پر ورځ د « ۱۴۰۰ کال د لېندۍ پر ۲۱ مه» په خپره شوې خبرپاڼه کې ویل شوي،چې دغه بندیزونه د افغانستان په تخار، بلخ، جوزجان او غور ولایتونو کې پر رسنیو لګول شوي دي.
خبر پاڼه کې راغلي، په دغو ولایتونو کې د رسنیو مسولینو ته ویل شوي،چې په راډیوګانو او ټلویزیونونو کې به د مېرمنو غږ او موسیقي نه خپرېږي او د داسې سریالونو خپرول دې بند کړي،چې د مېرمنو څېرې په کې ښکاره شوې وي.
خبرپاڼه کې وړاندې راغلي، په بلخ ولایت کې هم ښځینه خبریالانو ته ویل شوي،چې د هغوی غږ دې په رسنیو کې نه خپرېږي او بشپړ اسلامي حجاب دې مراعات کړي.
همدارنګه په بادغیس ولایت کې په رسنیو کې د مېرمنو شتون منع شوی او اوس مهال په یاد ولایت کې هېڅ ښځینه خبریاله په رسنیو کې کار نه کوي.
که څه هم د اسلامي امارت مسولین وایي، دوی په رسنیو کې د مېرمنو له شتون او فعالیت سره ستونزه نه لري، خو په ځینو ولایتونو کې اړوندو چارواکو د رسنیو پر فعالیتونو نوي محدودیتونه لګولي دي.
د یادولو وړ ده،چې په دې وروستیو کې سلګونه ښځینه او نارینه خبریالان یا له دندو ګوښه شوي او یا هم اړ شوي دي،چې د محدودیتونو له امله خپلې دندې له لاسه ورکړي.
