Skip to content
د امریکا بهرنیو چارو وزارت وايي، انټوني بلېنکن له خپل قطري سیال سره د تلیفوني خبرو پرمهال افغانستان کې د راتلونکو همکاریو په تړاو خبرې کړي دي.
د امریکا بهرنیو چارو وزارت د خبرپاڼې یوه برخه:« د بهرنیو چارو وزیر بلینکن له خپل قطري سیال سره د افغانستان په تړاو د تازه مسایلو په اړه هم خبرې وکړې. د دې ترڅنګ یې د دوه اړخېزو اړیکو او د ایران په ګډون د سیمې هېوادونو په اړه هم خبرې اترې درلودې.»
د امریکا بهرنیو چارو وزیر انتوني بلېنکن پرخپله ټویټر پاڼه هم لیکلي،چې له قطري لوري یې د دې لپاره مننه کړې،چې امریکايي وګړو سره یې د خوندي وتلو په برخه کې همکاري وکړه.
بلېنکن زیاته کړې:«د قطر له بهرنیو چارو وزیر الثاني سره مې خبرې وکړې، موږ د امریکايي وګړو د خوندي ټرانزیټ او له قانوني پلوه د هغو افغانانو چې له افغانستان د وتلو هڅه کوي، د اېستلو په برخه کې د همکارۍ لپاره د قطر د هلو ځلو مننه وکړه.»
دغه خبرې داسې مهال کېږي،چې قطر له تېرې اګسټ میاشتې راهیسې له امریکا سره په افغانستان کې تر بل هر هېواد ډېره همکاري کړې او د هغوی د ګټو ساتندوی دي.
اوس دغه هېواد په افغانستان کې د امریکا د ډيپلوماټيکو فعالیتونو استازیتوب هم کوي او دفتر یې هم په کابل کې د قطر په سفارت کې پرانیستی دی.
