Skip to content
د بریټانیا په لېورپول ښار کې د نړۍ اوو سترو اقتصادي هېوادونو یا جي اوه ناسته روانه ده،چې مهمې اجنډاوې یې نړیوالې روغتیايي ستونزې او د اقلیم بدلون دي.
دا په تېرو درې میاشتو کې دویم ځل دی،چې د بریټانیا پر مشرۍ او کوربتوب د جي ۷ هېوادونو ناسته جوړېږي،چې د افغانستان په اړه هم په کې مهمې پریکړې کېږي.
د جي اوه هېوادونو ناسته کې بریټانیا له افغان ولس سره د ۷۵ میلیونه پونډه اضافي مرستې ژمنه وکړه.
د بریټانیا د بهرنیو چارو وزیره لېز ټرس وايي:« بریټانیا له افغانستان سره راتلونکی ژمي کې بشري مرستې زیاتوي. هغه مرسته چې نن موږ اعلان کړې،هغه به وکړای شي،چې د خلکو ژوند وژغوري، د ښځو او نجونو حقوق به خوندي کړي او په سیمه کې به له ټیکاو سره مرسته وکړي. موږ چې د افغان ولس لپاره څومره په وس کې وي،هغه به وکړو.»
دغه مرستې بیا هم اسلامي امارات ته د سپارلو پر ځای یو ځل بیا د خوړو نړیوال سازمان په ګډون د خیر ښېګڼې بنسټونو ته ورکړل کېږي.
د خوړو د نړیوال سازمان اجرائیه مشر ډیویډ بیسلي د دغې مرستې هرکلی وکړ او زیاته یې کړه،چې له دې سره به په افغانستان کې د زرګونو کسانو ژوند وژغورل شي.
بیسلي زیاته کړه:« د خوړو نړیوال سازمان د بریټانیا د حکومت او ولس له دغې مرستې هرکلی کوي، ځکه دغه مرسته به د دې لامل شي،چې د زرګونه کسانو ژوند وژغورل شي. هلته ښځې او ماشومان د راتلونکې بدمرغۍ قرباني دي.»
بیسلي اندیښنه څرګنده کړه،چې په افغانستان کې شااوخوا ۲۳ میلیون وګړي له لوږې سره مخ دي او د وچکالۍ ګواښ اوس هم پر خپل حال پاتې دی.
بېسلي زیاتوي:«هغه څه چې موږ یې په افغانستان کې اوس مهال ګورو،د ډېرې خواشینۍ او اندېښنې وړ دي. ۲۳ میلیونه وګړي له لوږې سره مخ دي او ټول هېواد له وچکالۍ سره مخ دی. ښځې او ماشومان ددې هرڅه قرباني دي.»
د جي اوه هېوادونو په دې ناسته کې د بریټانیا،امریکا،کاناډا، جاپان، جرمني، فرانسې او ایټالیا استازو ګډون درلود.
روانه ناسته به د بریټانیا پر مشرۍ وروستۍ ناسته وي،چې په دغه هیواد کې ترسره کېږي.
