د زابل ولایت په مرکز کلات ښار کې د چهار شنبې پر ورځ د «۱۴۰۰ کال د لېندۍ پر ۱۸مه » لسګونه زابلي معلولین راټول شوي او د خپلو حقونو غوښتنه یې وکړه.
دغه معلولین ادعا کوي،چې د تېر حکومت پر مهال یوازې هغو معلولینو ستونزې حل کېدلې،چې واسطه یې لرله.
د دوی په خبره، د زابل معلولین له پامه غورځول شوي او د نوی حکومت مسوولین دې يې موجوده ستونزې ورته حل کړي.
یو تن معلول وايي:«زموږ د معیوبینو حالت سخت خراب دی،د حقونو د ترلاسه کولو پر مهال یې په دولتي ادارو کې په بېلابېلو پلمو کارونه ځنډول کېږي. زموږ غوښتنه دا ده،چې معلولینو ته دې خپل حقونه پر وخت او په ښه ډول ورکړل شي.»
د دغه ولایت د شهیدانو او معلولینو د ادارې مشر هم د زابلي معلولینو ستونزې پر ځای ګڼي او زیاتوي،چې د معلولینو د ستونزو د حل لپاره پلانونه لري او په عملي کولو سره به يې د معلولینو ټولې ستونزې پر وخت حل شي.
د زابل شهیدانو او معلولینو ادارې مشر مولوي عبدالحکیم دانش وايي:« موږ مرکز کابل کې د شهیدانو او معلولینو چارو وزارت سره پرلپسې اړیکې او ناستې کړي دي. د زابلي معلولینو ستونزې مو ورسره شریکې کړې. وزارت کې هم د معلولینو د ستونزو د حل ژمنه شوې. موږ به د یوه منظم پلان له مخې د زابلي معلولینو موجوده ستونزې حل کړو.»
د معلولینو د فزیکي بیا رغونې موسسې مسوولین وايي، د دوی ادارې په پرلپسې ډول د زابل له معلولینو سره مرستې کړي او په خبره یې ستونزې تر یوه برېده حل شوي دي.
زابل کې د معلولینو د فزیکي بیا رغونې موسسې ولایتي مسوول کمال احمد وايي:« زموږ موسسې له لورې له معلولینو سره د بېلابېلو توکو مرسته شوې،د بېلګي په ډول موږ ښځينه او نارینه معلولینو ته سلګونه امساوې ورکړي.موږ له دوی سره د هغو توکو مرسته هم کړې،چې له دوی سره په ورځنیو چارو کې د سخت معلولیت پر مهال مرسته کوي.»
د دغه ولایت کې د معلولینو ډېره برخه هغه کسان جوړوي،چې د تېرو جګړو پر مهال او ځمکني ماینونو له امله یې د بدن غړي له لاسه ورکړي.
