پوټین د افغانستان پر اوسني امنیتي حالت اندېښنه ښودلې

د ټایمز اف انډیا په نوم هندي رسنۍ خبر ورکړی،چې د دوشنبې پر ورځ د روسیې ولسمشر ولادیمیر پوټین د هند له لومړي وزیر نرېندرا مودي سره لېدنه کړې او  د نورو موضوعاتو سربېره یې د افغانستان پر روان حالت هم خبرې کړې دي.

پوټین د افغانستان پر اوسني امنیتي حالت اندېښنه ښودلې او د ښه کېدو لپاره یې د ژر اقدام غوښتنه کړې ده.

پوټین پر طالبانو غږ کړی دی،چې افغانستان کې ټول شموله حکومت جوړ کړي او د بشري حقونو خوندیتوب ته جدی پام وکړي.

هغه د افغانستان له اوسني سرپرست حکومت غوښتنه کړې،چې د نشه‌یي توکو د قاچاق او ترهګرۍ مخنیوي لپاره هڅې وکړي.

په ورته وخت کې د روسیې بهرنیو چارو وزیر سرګي لاوروف له خپل هندي سیال اېس جې شنکر سره هم لیدلي او په ترسره شوې ناسته کې په افغانستان کې د ټول شموله نظام پر جوړېدو ټینګار شوی دی.

بل خوا د افغانستان اسلامی امارت تر دې وړاندې ویلي، حکومت یې ټول شموله دی او د هېواد ټولو قومونو ته په کې ځای ورکړل شوی.