تاتار وايي، ډېری پروژې یې د ښارجوړونې له وزارت پورې اړوند دي، پداسې حال کې چې نوي حکومت تر اوسه پورې د ياد وزارت لپاره چارسمبالي وزیر هم نه دی معرفي کړی.
تاتار زیاته کړه:« د ښار جوړونې وزارت برخلیک مالوم نه دی. د ښار جوړونې چارسمبالی وزير تر اوسه پورې نه دی معلوم شوی. د نورو وزارتونو هغه معلوم شوي دي، تر څو زموږ اينوايسونه او اسنادو رسېدنه وکړي.»
د یوه ساختماني شرکت مشر حبيب الرحمن وايي:« يو له ډېرو عمده ستونزو څخه چې په تېرو درېيومياشتو کې ورسره مخ يو، هغه د ښار جوړونې وزارت په چوکاټ کې د وزير نه شتون دی. زه نه پوهېږم، که ادغاميږي،نو له کوم وزارت سره دې ادغام شي او که کوم بل وزير ټاکل کېږي بايد وزير وټاکل شي،ځکه دلته په سلګونه شرکتونه دي.چې له دې وزارت سره یې کار کړی دی.»
د رغنیزو شرکتونو دغه استازي د اوسني خراب اقتصادي وضعیت او فقر لامل هم د هغو سلګونو پروژو ځنډول یادوي،چې دوی سره په کې زرګونه کسان پر کار بوخت وو.
د یوه ساختماني شرکت مشر رياض وايي:« زموږ له دوی سره اينوايسونه بند دي. زموږ له دوی سره نيمه پروژې بندې دي، نه زموږ پروژې پرانېستل کېږي،نه زموږ اينوايسونه راکول کېږي.موږ چې وزارتونو ته ورځو،نو په همدې الفاظو ورته وایو، په زاريو له تاسو نه د خپلو پيسو غوښتنه کوو.»
د یوه بل ساختماني شرکت مشر اسماعيل بیا وايي:« ساختماني شرکتونه د اسلامي امارت يو بازو دی، ځکه نن سبا په افغانستان کې دغه اقتصادي ستونزې راغلي دي او خلک بې کاره دي،له هر شرکت سره په سلګونه کسانو کار کاوه.»
د افغانستان د رغنیزو شرکتونو ټولنه وايي، د شااوخوا ۵۰۰ شرکتونو پیسې یرغمل شوي او که ورنه کړل شي خپل اعتراضونه به پراخ کړي.
مالیې وزارت تازه څه نه دي ویلي،خو وړاندې یې یادې ټولنې ته ډاډ ورکړی وو،چې د ستونزې حل لپاره یې هڅې پیل کړي دي.
