د پاکستان بهرنیو چارو وزیر شاه محمود قریشي ویلي، اسلام اباد د افغانستان په اړه د اسلامي همکاریو سازمان د غړو هېوادونو کوربتوب کوي.
قریشي په یو تازه ټویټ کې ویلي،دغه ناسته د سعودي عربستان په غوښتنه او وړاندیز د روانې ډیسمبر میاشتې په پنځلسمه نېټه اسلاماباد کې ترسره کېږي او هیله یې ښودلې،چې ښې پایلې به ولري.
قریشي زیاتوي:« په افغانستان کې جدي بشري وضعیت ته په کتو سره، پاکستان د اسلامي هېوادونو د همکارۍ سازمان او د هغوی د بهرنیو چارو وزیرانو د ناستې کوربتوب کوي. دغه ناسته به د روانې ډیسمبر میاشتې پر ۱۵مه نېټه جوړه شي.»
قریشي ټینګار کړی دی، که نړیوال په افغانستان کې د اقتصادي او بشري ناورین مهارول غواړي،باید د افغانستان ۹.۵ میلیارده کنګل شوې پیسې راخوشې کړي.
قریشي ویلي،په دې تړاو یې تر دې وړاندې هم یو شمیر اروپايي او امریکايي هېوادونه را غوښتي وو،چې ګډې مشورې ورسره وکړي.
قریشي زیاتوي:« موږ د ملګرو ملتونو د امنیت شورا پنځه دایمي غړي هېوادونه لکه؛ کاناډا، جرمني، استرالیا، د اروپايي ټولنې، نړیوال بانک او ملګروملتونو استازي را غوښتي وو،چې د افغانستان په تړاو د اړوندو سازمانونو او نړیوالو یوه ګډه هوکړه ترسره شي.»
پاکستان تر دې وړاندې، د ټرویکا پلس ناستې کوربتوب وکړ،چې د امریکا، روسیې او چین استازو په کې له افغانستان سربیره پر نړیوالو مسایلو بحثونه وکړل.
کابل په اسلااباد کې راتلونکې ناستې ته چې لس ورځې وروسته د ریاض پر مشرۍ ترسره کېږي، هېله مندي ښودلې او د دې ناستې هرکلی یې کړی دی.
