د سیاسي چارو کارپوهان وايې، دواړه لوري پر یوبل باور نه لري او په کار دا ده،چې دواړه اړخونه خپلې تیرې ژمنې عملي کړي،ترڅو په راتلونکې کې داسې توافق ته لار اواره شي،چې عملي وي.
د سیاسي چارو کارپوه سرور نیازی وايي:« اوس دوی پر یوه بل باندې لازم باور نه لري، خو هم امریکایانو ته په کار ده، چې خپلو تعهداتو باندې وفا وکړي او هم طالبانو ته. له دې پرته که وضیعت همداشان روان وي، د اقتصادي بحران لمن به پراخه شي.»
په افغانستان کې واک ته د اسلامي امارت له رسېدو راپدیخوا دوه ځلې د طالبانو او امریکایي استازو ترمنځ ناستې شوي دي، خو د خبرو عملي پایله یې لا نه ده څرګنده.
اسلامي امارت او امریکایان په دوه پړاوه خبرو کې داسې کوم توافق ته نه دي رسیدلي،چې تمه یې کیده،خو اسلامي امارت له امریکا سره وروستي مذاکرات هیله بښونکي یاد کړي او زیاته کړې ده،چې په یوه او دوه ناستو کې ستونزې نه حل کېږي او وخت ته اړتیا لري.
په ناروې کې د افغانستان پخوانۍ سفیره شکریه بارکزۍ وايي، له هغې مخکې چې هوکړه نه وي شوي،هیڅ ډول ژمنې د عمل وړ نه دي او د دوحې په وروستیو مذاکراتو کې د کابل او واشنګټن ترمنځ هېڅ ډول هوکړه نه ده شوې او یوازې د یوبل نظریات اوریدل شوي دي.
بارکزۍ زیاته کړه:« د تعهدات عملي کول دوه اصلو ته ضرورت لري. لومړی دا چې یو سیاسي تعهد د هغو هوکړو پر اساس چې شوي دې باید موجود وي او دواړه خواوې یوې موافقې ته سره ورسیږي،خو تر اوسه پورې د طالبانو او امریکا ترمنځ کوم اساسي توافق نه دی شوی ، خبرې شوي دي او یو د بل نظریات اوریدل شوي دی. داسې توافق ته سره نه دي رسیدلي،چې پرهغې عمل وشي.»
