د افغانستان لپاره د پاکستان ځانګړي استازي د “تروریزم تر سیوري لاندې پاکستان- افغانستان اړیکې” تر سرلیک لاندې یوه سیمینار ته د خبرو پرمهال ویلي، د افغانستان سرپرست حکومت تر اوسه پورې د پاکستاني طالبانو تحریک(ټي.ټي.پي) په اړه د پاکستان اندېښنو ته رسېدنه نه ده کړې.
محمد صادق خان دغه راز ادعا کړې چې له امریکا سره د جګړې پر مهال ټي.ټي.پي له افغان طالبانو ملاتړ کړی و او همدې همکارۍ ته په پام اوس د افغانستان چارواکي د يادې ډلې پر وړاندې ګام پورته کولو په تړاو وېشلي نظرونه لري.
صادق خان په دې اړه ویلي: « سره له دې چې په وروستیو کې د پاکستان بهرنیو چارو وزیر کابل ته مثبت سفر درلود، خو لاهم پاکستاني طالبان د پاکستان او افغانستان تر منځ د اړیکو په لاره کې خنډ پاتې دي. د پاکستاني طالبانو تحریک یوازې د پاکستان لپاره ننګونه نه ده بلکې د پاکستان او افغانستان اړیکې زیانمنوي او ډېری افغانان له دې واقعیت خبر نه دي. دا چې ټي.ټي.پي د افغان طالبانو پر ملاتړ د امریکا پر ضد جګړه کې برخه اخیستې وه؛ اوس افغان طالبان وېره لري که د ټي.ټي.پي پر ضد اقدام وکړي، هغوی به له داعش سره یوځای شي.»
که څه هم د افغانستان حکومت په دې اړه تازه څه نه دي ويلي، خو په تېر کې يې په ځلونو په افغانستان کې د وسله والو ډلو موجوديت ادعاوې رد کړې دي او ډاډ یې ورکړی چې د افغانستان خاوره به د هېڅ هېواد پر ضد ونه کارول شي.
د سیاسي چارو شنونکي بیا په افغانستان کې د پاکستاني طالبانو تحریک د موجودیت په اړه د پاکستاني چارواکو ادعا بې بنسټه بولي او وایي، دغه هېواد تل د خپلو ګټو لپاره د خپل بام واوره پر نورو اچوي.
پخوانی ډېپلومات عزیز معارج وايي: « د پاکستان پالیسي یا د افغانستان په اړه د دوی بهرنی سیاست تل د پاکستان د ګټو پر بنسټ جوړ شوی او عملي شوی دی. په اوسني حالت کې دوې سترې موخې لري؛ یو دا چې د هند پلاوي افغانستان ته راځي او پاکستان کوښښ کوي چې هند او د سیمې هېوادونو ته وښيي چې افغانستان د دوی دوست هېواد دی، ملاتړ او دفاع یې کوي، یانې غواړي افغانستان په دې مسایلو کې ښکېل کړي. ترڅنګ یې دا هم ښيي چې د ترهګرو ځالې او مرکزونه افغانستان دی نه پاکستان کې.»
د سیاسي چارو شنونکی شهسوار سنګروال وايي: « دا د پاکستان خپلمنځني ستونزې دي او باید په خپله یې حل کړي. څرنګه چې په پاکستان کې روان کړکېچ اوس په سیاسي، اقتصادي او نظامي لحاظ د دوی له کنټرول وتلی، ځکه نو د خپلو ناکامیو پړه پر افغانستان اچوي. د افغانستان حکومت په وار وار دا خبره کړې چې ټي.ټي.پي یا نور تروریستي ګروپونه په افغانستان کې نه شته او نه هم له دې ځایه تمویلېږي.»
ځینې نور بیا په دې اند دي چې پاکستان د دې ډول بې بنسټه ادعاوو پر بنسټ غواړي پر سرپرست حکومت د فشارونو راوړلو له لارې خپل اهداف تعقيب کړي.
د سیاسي چارو شنونکی اسماعیل ځدراڼ وايي: « زه فکر کوم دوی له دې لارې په اسلامي امارت فشار راوړي، ترڅو د دوی غوښتنې ومني او د لاسوهنې داسې زمینه برابره شي لکه په تېرو دولتونو کې چې دوی کوله. خو اسلامي امارت په جرئت سره ورته وايي چې د دوی لاسوهنې ته اجازه نه ورکوي او که پاکستان غواړي له افغانستان سره ښې اړیکې ولري، نو باید له نړیوالو قوانینو او اصولو سره سم د سفارت له لارې مخکې لاړ شي.»
پاکستاني چارواکي په داسې حال کې له افغان خاورې د ترهګرو ډلو د ګواښونو په تړاو خبرداری ورکوي چې د اسلامي امارت سرپرست حکومت څو ځله د ګاونډیو او سیمې هېوادونو پر وړاندې د افغان خاورې د نه کارېدنې ډاډ ورکړی او د یو شمېر هېوادونو دا ډول ادعاوې یې ناسمې بللې دي.
