بلخ ولایت په دهدادي ولسوالۍ کې د ۴۰ مېګاواټو په ظرفیت د لمریزې برېښنا د تولید پروژې چارې پيل شوې.
د دې پروژې ټول لګښت ۳۰ ميليونه ډالر اټکل شوی چې د پانګوالو او سوداګرو له لوري ورکول کېږي. د دوی په خبره، د پروژې په بشپړېدو سره به د برېښنا کمښت په برخه کې د خلکو او صنعتکارانو ستونزې راکمې شي.
پانګوال محمد ابراهیم غضنفر وايي: « په اصل کې ۴۴.۵ مېګاواټه لمریزه برېښنا به په دهدادي کې تولید شي. نن مو د دې پروژې پرانیستنه وکړه او په ۵۰۰ جریبه ځمکه به جوړه شي. په دې پروژه شاوخوا ۳۰ میلیونه ډالره پانګونه کېږي چې کارونه به یې له ۲۰ تر ۲۴ میاشتو وخت واخلي.»
د افغانستان برېښنا شرکت اجراییوي رییس عبدالباري عمر وايي: « د دې پروژې په پرانیستلو سره به زرګونه کورنۍ، فابریکې، سوداګریز مارکېټونه او دولتي ادارې له برېښنا برخمنې شي. همدارنګه سلګونه یا زرګونه ځوانانو ته به د کار زمینه هم برابره شي.»
د بلخ والي محمد یوسف وفا وايي:« په هره برخه کې څوک ستونزې لري، موږ ورسره همکاري کوو او دوسیه به یې موږ خپله ګرځوو، وزارت په وزارت او ریاست په ریاست به ګرځو. نو که ستونزې نه وي، بیا راځئ داسې غټې پروژې پيل کړئ، یو افغان به هم بېکاره پاتې نه شي.»
که څه هم افغانستان د برېښنا د تولید ډېرې سرچينې لري، خو پر دغو سرچینو د کافي پانګونې نه کېدو له امله لاهم پر وارداتي برېښنا تکيه دی.
په بلخ کې د برېښنا د توليد تازه پيل شوې پروژې ته په کتو، چارواکي او سوداګر له پانګوالو په بېلابېلو برخو کې د پانګونې غوښتنه کوي.
د صنعت او سوداګرۍ وزارت معین احمدالله زاهد وايي: « له برېښنا ریاست غوښتنه لرو چې د قوانینو په اسانه کولو او د یوه سالم رقابتي چاپېریال په رامنځته کولو سره د دې زمینه برابره کړي چې هرڅوک وکولی شي په دغه شان پروژو کې ونډه واخلي.»
د بلخ سوداګرۍ او پانګونې خونې رییس اسدالله اسدي وايي: « تر هغو چې افغانستان له یوه مصرفي او وارداتي هېواد صنعتي، تولیدي او صادراتي هېواد بدل نه شي، موږ پرمختګ نه شو کولی. راشئ په افغانستان کې پانګونه وکړئ، ترڅو له وارداتو خلاص شو. ترڅو به برېښنا په پیسو اخلو، حال دا چې موږ د برېښنا د تولید لپاره تر ټولو غوره سرچینې لرو.»
د ځايي چارواکو د مالوماتو له مخې، د بلخ په دهدادي ولسوالۍ کې د برېښنا توليد دا تازه پيل شوې پروژه به په راتلونکو دوو کلونو کې بشپړه او ګټې اخيستنې ته وسپارل شي.
