د رسنيو او خبريالانو یو شمېر ملاتړو بنسټونو مسوولین او خبريالان د رسنيو د ازادۍ نړيوالې ورځې نمانځنې په موخه راټول شوي دي.
دوی د نړيوالو له لوري له افغانانو او په ځانګړې توګه له خبريالانو سره د مرستو پر کمېدو سربېره هم له خبريالانو د ملاتړ او د دوی ظرفيت لوړونې په برخو کې د خپلو هڅو ډاډ ورکوي.
د افغانستان رسنيز بنسټ رییس ابوزر ساران سرپلي وايي: « ټول له مالي ستونزو سره مخ دي، خو خبریالان تر نورو ډېرې مالي ستونزې لري. هغه خبریالان چې وزګار دي، تر نورو ډېر له ستونزو او بېکارۍ ځورېږي. سره له دې چې ځینې نهادونه ستر شعارونه ورکوي، خو کار دومره نه کوي.»
د ښځينه خبريالانو بنسټ که څه هم د ځينو ادرسونو له لوري د ښځو د تخريب کېدو ادعا کوي، خو ډاډ ورکوي چې د ښځينه خبريالانو د ظرفيت لوړولو په برخه کې به خپلې هېڅ راز هڅې ونه سپموي.
د ښځينه خبريالانو بنسټ رییسه مشهوده سروري وايي: « د افغان ښځینه خبریالانو بنسټ یوازې افغان ښځینه خبریالانو ته ځانګړی شوی او هڅه کوي چې ښځینه خبریالانو او د ژورنالېزم څانګې مینه والو ته هر ډول اسانتیاوې او امکانات چمتو کړي. موږ داسې بنسټونه او اشخاص هم لرو چې نه یوازې ملاتړ نه کوي، بلکې تخریب هم کوي. دوی موږ ته د کار اجازه نه راکوي او پړه پر حکومت اچوي؛ نه خیر، حکومت له موږ سره ستونزه نه لري.»
خو ځينې نور بنسټونه بيا خبر ورکوي چې د تېر کال پرتله په افغانستان کې د فعالو ښځينه خبريالانو شمېر زيات شوی او په خبره يې د دوی له ډلې ډېری هغه يې له امتياز پرته په افتخاري ډول دندې ترسره کوي.
دوی د ښځينه خبريالانو ياد وضعيت ته په کتو له نړيوالو مرستندويانو غواړي چې له افغان خبريالانو سره مرستې او همکاري وکړي.
د افغانستان خپلواکو خبريالانو ټولنې رییس حجتالله مجددي وايي: « زموږ موندنې ښيي چې له تېر کال راهیسې په رسنیو کې د ښځینه کارکوونکو شمېر ۱۴۷ تنه زیات شوی. خو له بده مرغه باید ووایم چې زموږ له نیمايي ډېر همکاران په افتخاري بڼه کار کوي او دا د افغان خبریالانو او رسنیو لپاره یوه لویه فاجعه څرګندوي. زه هیله لرم له دې ډېرې هڅې وشي او په ځانګړې توګه نړیوال بنسټونه د دې ستونزې په هوارولو کې مرسته وکړي.»
له دې سره، ملګرو ملتونو هم د مطبوعاتو ازادۍ نړيوالې ورځې په مناسبت په افغانستان کې له رسنيو د خپل ملاتړ د دوام ډاډ ورکړی، خو په دې اړه يې خپره کړې اعلاميه کې د خبريالانو او رسنيو وضعيت ناوړه بللی.
